Firazanana nôrdika
Ny firazanana nôrdika dia foto-kevitra ara-pirazanana nipoitra tao amin' ny antrôpôlôjian' ny taonjato faha-19. Noheverina ho firazanana manokana izy io na iray amin' ireo zana-pirazanana nizarazaran' ny antrôpôlôga sasany ny Kaokazôida tamin' ny faramparan' ny taonjato faha-19 ka hatramin' ny tapaky ny taonjato faha-20, ary nilazana fa ny tanindrazany dia i Eorôpa Avaratra-Andrefana sy Avaratra (indrindra i Skandinavia), indrindra ho an' ny vahoaka toy ny Anglô-Saksôna, ny Vahoaka Jermanika, ny Balta, ny Finô-Baltika, ny Frantsay Tavaratra, ary Selta sy ny Slava sasany. Ny toetra ara-batan' ny Nôrdika, araka ny fiheverana tamin' izany fotoana, dia nahitana maso mazava, hoditra mazava, tsanganana lava, ary karandoha lehibe; ny toetra ara-tsain' izy ireo dia noheverina fitiavana ny marina, ny fizaràna mitovy, ny toe-tsaina mifaninana, ny fahatsorana, ny fitazomana tsiambaratelo ary ny fiolonolonana. Tany am-piandohan' ny taonjato faha-20, ny finoana fa ny firazanana nôrdika no sampana ambony amin' ny firazanana kaokazôida dia niteraka ny nôrdisisma, izay fanindrahindrana ny firazanana nôrdika.
Ny hetsika tsy refesi-mandidy toy ny nazisma dia nandray an' hevitra io, ka nahita ao ny firazanana ambony, izay sady tokony hanjakazaka amin' ny Eorôpeana hafa, no koa hazakazaka amin' ny olombelona hafa rehetra.
Tamin' ny fisandratry ny siansan' ny fototarazo môderina dia lany andro eo amin' ny lafiny biôlôjika ny hevitra momba ny fananan' ny olombelona firazanana miavaka. Tamin' ny taona 2019, ny American Association of Biological Anthropologists dia nilaza fa ny fiheverana ny firazanam-bolon-koditra ho lafiny voajanahary amin' ny biôlôjian' ny olombelona, sy ny firafitry ny tsy fitoviana (fanavakavaham-bolon-koditra) izay mipoitra avy amin' ny fiheverana toy izany, dia anisan' ny singa manimba indrindra eo amin' ny zavatra iainan' ny olombelona ankehitriny sy taloha.
Jereo koa
[hanova | hanova ny fango]Fanasokajiana ara-bolonkoditra ny olombelona