Katôlisisma tradisiônalista
![](http://upload.wikimedia.org/wikipedia/commons/thumb/0/02/Missa_tridentina_002.jpg/284px-Missa_tridentina_002.jpg)
Ny katôlisisma tradisiônalista dia hetsika izay manantitrantitra ny finoana, ny fanao, ny fomba, ny lova, ny endriky ny litorjika, ny endri-panompoana manokana ary ny fanolorana fampianarana mifandray amin' ny Eglizy Katôlika talohan' ny Kônsily Vatikana II (1962–1965). Manantitrantitra manokana ny lamesa tridentina, ny litorjia manaraka fomba rômanina - izay nosoloina amin' ny ankapobeny ny lamesa vaovao nataon' i Paoly VI - ny Katôlika tradisiônalista.
Maro ny Katôlika tradisiônalista tsy tia ny fanovana litorjika nanaraka ny Kônsily Vatikana II, ary aleony nanohy ny fanao sy ny lova talohan' ny Kônsily Vatikana II. Misy koa mahita ny fampianarana ankehitriny momba ny ekiomenisma ho mampanjavozavo ny fanavahana ny Katôlika sy ny Kristianina hafa. Matetika ny katôlisisma traditiônalista dia mpandala ny nentin-drazana amin' ny filôzôfiany sy ny fomba fijeriny izao tontolo izao, mampandroso ny fomba fiakanjo maotina ary mampianatra fomba fijery mampifameno ny andraikitry ny lahy sy ny vavy.
Mandà ny fitondran' ny papan' ny Eglizy Katôlika ankehitriny ny Katôlika tradisiônalista sasany, ka lasa sedevakantista (izay mihevitra fa foana tsy misy papa ny fiketrahana), sedeprivasiônista (izay mihevitra fa tsy ara-dalana ireo papa taorian' ny Vatikana II), na kônklavista (ireo izay mamorona kôklava mba hifidy papa hafa ankoatry ny efa eo izay heveriny fa tsy izy). Koa satria tsy miombona tanteraka amin' ny papa sy ny fitondran' i Rôma intsony ireo vondrona ireo, dia tsy raisina ho anisan' ny Eglizy Katôlika, fa antokom-pivavahana misaraka. Matetika dia avahana ireo vondrona ireo (indraindray antsoina hoe Tradisiônalista radikaly) sy ny Katôlika izay manaiky ny fampianarana sy ny fahefan' ny Eglizy Katôlika nefa mbola tia ny fomba nentim-paharazana sy ny fanao taloha ary koa ny mamesa tridentina amin' ny teny latinina.