Golden Coast (faritra)

I Gold Coast dia morontsiraka afrikana manatrika ny Hoalan' i Ginea eo anelanelan' i Cape Three Points any andrefana sy i Cape Saint-Paul any atsinanana, any Ganà ankehitriny. Amin' ny teny pôrtogey izy dia atao hoe Costa do Ouro; fa amin' ny teny frantsay kosa dia atao hoe Côte de l'Or, izay samy midika hoe "Morontsiraky ny Volamena".

Nanomboka tamin' ny diany voalohany nataon' ny Eorôpeana hikaroka tany vavao tamin' ny taonjato faha-15 ka hatramin' ny taonjato faha-19, io anarana io dia nampiasaina hanondroana ny tobim-barotra rehetra tany amin' ny morontsirak' i Ginea, izany hoe ny morontsiraka manomboka any Liberià ka hatrany Nizerià, izay nifampivarotan' ny Eorôpeana entana miavaka miaraka amin' ny mponina eo an-toerana. Avy any andrefana ka hatrany atsinanana dia nifandimby i Pepper Coast, Ivory Coast (mifanandrify amin' i Kôtidivoara ankehitriny) , i Gold Coast ary i Slave Coast. I Gold Coast manokana dia nahitana tobim-barotra maro nahafahan' ny Eorôpeana nanakalo ny entany amin' ny akoram-bolamena nalaina tao amin' ny toeram-pitrandrahana any Ganà Ambony (Upper Ghana), tanin' ny Asanty. Notazonina hatramin' ny taona 1957 io anarana io miaraka amin' ny anarana ôfisialin' ny zanatany britanikan' i Gold Coast, izay, rehefa lasa mahaleo tena, dia nitondra ny anarana teratany hoe Ghana; hita eo amin’ ny sarintany anefa io anarana io tamin’ ny atsasany voalohany amin’ ny taonjato faha-20.