Fiteny hebreo mizrahy
Ny fiteny hebreo mizrahy na fiteny hebreo mitsrahy na fiteny hebreo tatsinanana dia manondro rafi-panononana ny fiteny hebreon' ny Baiboly amin' ny litorjia ampiasain' ny Jiosy Mizrahy avy amin' ny firenena arabo na any amin' ny tany hafa any Atsinanana, ary manana fiaviam-boambolana amin' ny fiteny arabo, persana, hindy, kiorda na fiteny hafa any Afovoany Atsinanana na any Azia. Raha ny marina, ny fiteny hebreo mizrahy dia teny mahafaobe ho an' ny fitenim-paritra maro.
Tsy heverina ho anisan' izy io ny teny hebreo sefarada (na sefardika), na dia nampiasaina tany Afovoany Atsinanana sy tany Afrika Avaratra aza. Noroahina avy tany Espaina ny Sefarada (na Sefardima), ary nanorim-ponenana tao amin' ny Mizrahy, saingy tany amin' ny tany toa an' i Siria sy i Marôka dia nisy tsy fitoviana lehibe teo amin' ny fanononana ny teny hebreo sefarada sy fanononana ny teny hebreo teo an-toerana. Heverina ho miavaka koa ny teny hebreo iemenita, satria hafa tanteraka ny fanononana ny zanatsoratra.
Teny mitovy no indraindray ampiasaina amin' ny fanononana ny teny hebreo israeliana vaovao ataon' ny Jiosy manam-piaviana arabo na mizrahy. Izany, amin' ny ankapobeny, dia marimaritra iraisana eo amin' ny teny hebreo vaovao sy ny fanononana litorjika nentim-paharazana araka ny voalaza eto.