Urmia (farihy)
I Urmia dia farihy marivo sy masira any amin' ny tapany avaratra-andrefan' i Iràna, ao andrefan' ny tanànan' i Tabriz, ao amin’ ny faritr’ i Azerbaijàna Iraniana (eo anelanelan' ny faritanin' i Azerbaijàna Atsinanana sy ny an’ i Azerbaijàna Andrefana). Izy no farihy lehibe indrindra any Iràna, izay ao amin' ny valan-javaboary mitovy anarana aminy. 145 km eo ho eo ny halavany ary 50 km eo ho eo ny salan-tsakany. Misy ampahany ny ao amin' ny lempona fisaka voahodidin-tendrombohitra izy ary mahatratra 1 200 m mahery ny haavo misy azy ambonin' ny haavon' ny ranomasina. Mihamasira sy mihakely ary atahorana hanjavona ity farihy ity.
Atao amin' ny teny persana hoe دریاچه ارومیه / Daryācheh-ye Oroumieh izy; SY amin' ny teny armeniena hoe Կապուտան լիճ / Kapoutan litch; ary amin' ny teny azery hoe اورمیه ﮔﺆﻟﻮ / Urmu gölü.
Renirano lehibe no mamatsy an’ io farihy io nefa tsy misy ny renirano mivoaka avy ao aminy, ka izany no manome azy ny sata ara-jeôgrafian’ ny velaran-drano endôreika (tsy mivarina an-dranomasina), indraindray ampitovina amin' ny "ranomasina kely anaty tany". Ny renirano Aji Chay (na Talkheh Rud) no sakeli-drano lehiben' ilay farihy, izay mikoriana any avara-atratsinanan' i Azerbaijàna Iraniana ary mitondra ny oram-panala mitsonika avy any amin' ny tangorom-tendrombohitr' i Sabalân sy ny an’ i Sahand, ary ao koa ny renirano kambana Zarineh (Jagatu) sy Simineh (Tatavi), avy any atsimo.
Ny hasiran' ny ranony be loatra, izay tsy mitsaha-mitombo, no azo anazavana ny tsy mampisy hazan-drano hafa afa-tsy karazan-drakaka sy karazam-patsa sasany. Mihena isan-taona ny velarany.