Trano (fanandroana)

Ny trano, amin' ny fanandroana hôrôskôpika, dia fizaràna ny bolan-danitra na ny hôrôskôpa ho ampahany maromaro (matetika roa ambin' ny folo), izay miankina amin' ny fotoana sy ny toerana misy azy fa tsy amin' ny datin' andro. Amin' ny fanandroana hindoa (atao hoe Jyotiṣa) dia fantatra amin' ny anarana hoe Bhāvas ireo trano ireo.

Na izany aza, raha miankina amin' ny zavatra voajanahary ny fizaràna ho evan' ny zôdiaka (izay faritan' ny volana 12 ao amin' ny taona), ny fizaràna ho trano dia tsy misy zavatra voajanahary iankinany. Tsy manana anarana izy ireo, tsy mitovy amin' ny evan' ny zôdiaka, fa nomena laharana manomboka amin' ny I ka hatramin' ny XII araka ny filaharan' ny evan' ny zôdiaka, manomboka amin' ny Manonga (Ascendant). Araka ny foto-pampianarana momba ny fanandroana, ny trano roa ambin' ny folo dia mandrakotra sehatra maro amin' ny raharahan' ny olombelona. Noho izany, raha mifanaraka amin' ny fomban-javatra 12 ny tsingerina isan-taon' ny eva, ny tsingerina isan' andron' ny trano kosa dia mifanitsy amin' ny fiainan' ny olona iray.

Satria toa mihodina ao anatin' ny 24 ora ny bolan-danitra, ireo trano ireo dia itoeran' ny planetan' ny rafi-masoandro mifanesy isan' andro. Ny planeta dia hita ao amin' ny trano tsirairay amin' ny zotra mifanohitra amin' ny filaharan' ny trano. Ohatra, raha vao nipoitra ny planeta iray ao amin' ny trano faha-XII, dia manakaiky ny faratampony ambony ny planeta ao amin' ny trano faha-X. Atao hoe "fampianadranoana" ny fandrafetana azo tsapain-tanana an' ireo trano ireo amin' ny lohahevitra astraly.

Ny trano ao amin' ny hôrôskôpa dia maneho sehatra traikefa samihafa izay iasan' ny angovon' ny eva sy ny planeta, izay faritana amin' ny lafiny ara-materialy sy araka ny traikefa niainan' ny tena manokana. Na dia maro aza ny fomba fampiantranoana, misy tsy fitoviana ny hevitra omen' ny mpanandro ny trano tsirairay, ary izany tsy fitoviana izany dia mety ho kely na lehibe.