Strasbourg
I Strasbourg dia tanàna ao amin' ny faritra avaratra-atsinanana any Frantsa, ao amin' ny lemak' i Alsace, eo amin' ny sisin-tany manasaraka an' i Frantsa amin' i Alemaina. Izy no renivohitry ny Faritra Alsace ary renivohitry ny Departemantan' i Bas-Rhin. Izy koa no renivohitra ara-pôlitikan' ny Vondrona Eorôpeana.
Ity kaominina ity dia antsoina hoe Strassburg na Straßburg amin' ny fiteny alemàna, Strossburi na Stroßbùrri amin' ny teny alzasiana (alemanika), Strossburch amin' ny fiteny fransika renana (faritra avaratra amin’ i Alsace, Plateau lorraine, Palatinat), ary Chtrasbourg amin’ny teny velcka (fitenim-paritra frantsay amin' ny lohasaha ao manodidina an’ i Vosges, indrindra ny lohasaha ambony Bruche).
I Strasbourg no misy ny foiben' ny Parlemanta Eorôpeana sy ny Filankevitr' i Eorôpa ary ny Fitsarana Eorôpeana momba ny Zon' Olombelona. Foibe ara-pitantanana sy ara-barotra ary ara-kolontsaina koa izy, ary tena vohi-pihaonana eorôpeana. Manana anjara toerana lehibe ao ny seranan-tsambo an-denirano eo amoron' i Rhin.
Tanàna rômana i Strasbourg tamin' ny voalohany, ary nobodoin' ny Hona talohan' ny nidirany tao amin' ny Empira Rômana Masina tamin' ny taona 962. Lasa foibe ara-toekarena sy ara-tsaina ary ara-javakanto izy avy eo. Niorina tamin' ny taona 1621 ny oniversite voalohany tao Strasbourg. Nandray anjara lehibe tamin' ny fielezan' ny Fanavaozana prôtestanta (na Refôrmasiôna) io tanàna io.
I Strasbourg dia tafiditra tao amin' ny Fanjakan' i Frantsa teo anelanelan' ny taona 1681 sy 1870 saingy taorian' ny ady tamin' i Alemaina tamin' ny taona 1870-1871 dia niverina amin' ny Alemàna indray. Ny Fifanarahana tao Versailles tamin' ny taona 1918 no nampiditra indray an' ilay tanàna sy ny faritra misy azy ao amin' ny Repoblika Frantsay. Voadaroka baomba mafy nandritra ny Ady Lehibe Faharoa i Strasbourg ka taorian' ny ady dia lasa tandindon' ny fampihavanana eorôpeana tamin' ny fananganana ny Filankevitr' i Eorôpa.