Schinus terebinthifolius
Ny Schinus terebinthifolia na Schinus terebinthifolia dia karazana zavamaniry dikôtiledôna, ao amin' ny fianakaviana Anacardiaceae, teratany any Amerika Atsimo. Manana ravina sarotra mihintsana sy voany fanao zava-manitra izay fantatra amin' ny anarana hoe "berôzy" izy. Any Amerika Atsimo (Brezila) no nipoirany, nefa ankehitriny dia volena mba hahazoana voany izy any amin' ny faritra mafana hafa, toa an' i La Réunion na i Madagasikara. Ity karazana ity dia toy ny zavamaniry mitsiry hoazy, izay indraindray lasa zavamaniry manafika.
Toetoetrany
[hanova | hanova ny fango]
Hazo mananana halava mety mahatratra 3 ka hatramin' ny 10 m, ary indraindray 15 m, sy savaivo mirefy 10 hatramin' ny 30 sm (indraindray 60 sm) ny Schinus terebinthifolius.
Manana halava mirefy 7,5 hatramin' ny 15 sm ny raviny maharitra sy mifandimby, izay misy 5 na 7 na 9 zana-dravina salavalava, mifanohitra, afa-tsy ny farany. Feno na misy nifinifiny ny felan-dravina, mizoro ny fotony sy ny tampony.
Mivondrona anaty sampaho 2,5 hatramin' ny 10 sm ny voniny, izay tena misampantsampana, eo am-pototry ny ravina ambony indrindra. Entin' ny foto-javamaniry samihafa ny vony lahy sy ny vony vavy fa tsy amin' ny zavamaniry tokana. Mamoaka fofon-dipoavatra na fofona terebinta izy ireo. Ny voniny, izay manana lavany sy sakany eo amin' ny 3 mm, dia misy kalisy foronin' ny ravimbony madinika maitso maranitra dimy sy vondrom-pelambony misy felany fotsy dimy manana halava mirefy latsaky ny 3 mm, lahimbony 10 na vavimbony misy fihary boribory. Zavamaniry misy mamimbony sy vovobony ahafahana mamokatra tantely somary manitra izy io.
Manana savaivo mirefy 4 ka hatramin' ny 5 mm ny voany, izay antsoina hoe "berôzy", izay mivondrona anaty sampaho matevina, miloko mena midorehitra, ny nofony misy litsoa sy manitra, somary mangidy kely ny tsirony. Misy vihiny salavalava, manja mazava, latsaky ny 3 mm ny halavany, ary mamoaka fofon-dipoavatra.