Rariny (filôzôfia)

Mizana

Ny rariny, izay atao hoe koa fahamarinana, amin' ny heviny mivelatra indrindra, dia foto-pitsipika filôzôfika sy ara-dalàna ary ara-môraly izay iheverana ny tokony hitondrana ny olona amin' ny fomba tsy miangatra. Araka io foto-pitsipika io dia tsy maintsy ankatoavina na lavina ny fihetsiky ny olona arakakaraka ny fahamendrehany araka ny môraly (ny tsara), ny lalàna, ny hatsaran-toetra na izay mety ho fenitra hafa enti-mitsara ny fitondrantena. Ny rariny, izay foto-pitsipika mahakasika ny zavatra rehetra, dia miovaova arakaraka ny kolontsaina. Tarigetra heverina ho fototra ho an' ny fiainana ara-piarahamonina sy ho an' ny sivilizasiôna ny rariny.

Fiarahamonina ahafahan' ny tsirairay mahazo izay "mendrika azy" ny fiarahamonina ahitana ny rariny. Miankina amin' ny karazana sehatra sy sampana filôzôfika isan-karazany ny fandikana ny hoe "mendrika", anisan' izany ny etika, ny fifotorana amin' ny saina, ny lalàna, ny fivavahana, ny fitovian-tantana ary ny rariny. Azo atao ny miteny fa fanjakana dia mikatsaka ny rariny amin' ny alalan' ny fitsarana sy ny fampiharana ny didim-pitsarana.