Haihay
Ny haihay dia karazana gidro manana rantsantanana lava, primata teratany eto Madagasikara, manana nify toy ny an' ny biby mpikiky izay mitombo hatrany, sy rantsantanana mahia kely izay azony ampiasaina hisokirana olitra avy ao anaty vatan-kazo. Daubentonia madagascarensis no anarany ara-tsiansa. Io no primata lehibe indrindra amin' mpandeha alina. Mampiavaka azy ny fomba tsy mahazatra fitadiavany sakafo: mikapoka ny hazo izy mba hahitany olitra, avy eo dia mikitika ny hazo amin' ny alalan' ny andrianifiny maranitra sy mitongilana mankany anoloana mba hanaovany lavaka kely izay ampidirany ny rantsantanany afovoany mahia mba hisintonany ny olitra. Mandany 5 % hatramin' ny 41 % amin' ny fotoana laniny amin' ny fitadiavany sakafo ity fomba fandoahany ity.
Ny haihay no hany sisa velona amin' ny vondron-karazana Daubentonia sy amin' ny fianakaviana Daubentoniidae. Sokajin' ny IUCN ho tandindomin-doza amin' izao fotoana izao ity karazam-biby ity. Ny karazana faharoa, atao hoe Daubentonia robusta, dia toa efa lany tamingana tao anatin' ny 1 000 taona farany, ary fantatra tamin' ny fikarohana momba ny fôsily.