Gabriel Biel

I Gabriel Biel (vakio hoe: [gabriel biːl]) dia filôzôfa skôlastika alemàna, teraka tao Speyer teo anelanelan' ny taona 1420 sy 1425 ary maty tany Einsiedel akaikin' i Tübingen tamin' ny 7 Desambra 1495. Tamin' ny taona 1432 izy dia notendrena ho pretra ary niditra tao amin' ny Oniversiten' i Heidelberg mba hahazoany ny diplôma bakalôrea. Nahomby tamin' ny fianarana izy ary lasa mpampianatra tao amin' ny fakiolten' ny zava-kanto nandritra ny telo taona, mandra-pahazoany diplôma ambony tao amin' ny Oniversiten' i Erfurt.

Fohy ny fitoerany voalohany dia naharitra mandra-pifindrany tany amin' ny Oniversiten' i Köln (na Cologne). Tsy nahavita ny diplômany tao koa izy, ary niverina tany Erfurt tamin' ny taona 1451 mba hamita izany. Niovaova be ny fandaharam-pianarana tao amin' ireo oniversite roa ireo, ka i Köln (Cologne) dia nanantitrantitra mafy an' i Tômasy avy any Akoina sy ny fandaharam-pianarana ankapobeny, fa i Erfurt kosa dia nanantitrantitra an' i William of Ockham (na Guillaume d'Ockham). Niankina tamin' ny skôlastika sy ny fomba fijery nôminalistan' i William of Ockham izy.