Armand Gaétan Razafindratandra

Sary sy soratra famantarana ny Kardinaly Razafindratandra, mitondra ny teny filamatra hoe Ut omnes unum sint ("Mba ho iray ihany ny rehetra”). Avy ao amin' ny basilika San Martino ai Monti, any Rôma.

I Armand Gaétan Razafindratandra dia kardinaly malagasy, arsevekan' Antananarivo tamin' ny taona 1994 hatramin' ny taona 2005. Teraka tamin' ny 7 Aogositra 1925 tao Ambohimalaza Miray eto Madagasikara ary maty tamin' ny 9 Janoary 2010 tao Mahajanga izy.

Zotram-piainany

Fahazazana sy fahatanorany

Teraka tamin' ny 7 Aogositra 1925 tao Ambohimalaza Miray ao akaikin' Antananarivo, eto Madagasikara i Armand Gaétan Razafindratandra. Efa governora tao ny raibeny. Razafindratandra dia nianatra tao amin' ny sekolin' ny paroasin' i Faravohitra. Nanohy ny fianarany tao amin' ny Seminera Madinika teny Ambohipo izy ary avy eo tao amin' ny Kôlejy St Michel, toeram-pampianaran' ny Zezoita, talohan' ny nianarany ny filôzôfia sy ny teôlôjia tao Ambatoroka.

Pretra

Rehefa avy notokanana ho pretra tamin' ny 27 Jolay 1954 tao amin' ny Diôsezin' Antananarivo i Armand Gaétan Razafindratandra dia nalefa tany amin' ny Institut catholique de Paris mba ho manam-pahaizana manokana amin' ny pastôraly kateketika sy hanaraka fianarana momba ny siansa sôsialy.

Rehefa niverina tao amin' ny diôsezy niaviany izy, dia voatendry ho talen' ny fampianarana katesizy sy lehiben' ny fiadidiana ny sekolim-panjakana (aumôneries), sady vikera tao amin' ny katedraly. Voatendry ho lehiben' ny Seminera Madinika, ary taty aoriana ho lehiben' ny Seminera Lehibe tao Ambatoroka.

Eveka

Voatendry ho Evekan' i Mahajanga izy tamin' ny 27 Avrily 1978, nohamasinin' ny kardinaly Victor Razafimahatratra tamin' ny 2 Jolay 1978. Voatendry ho Arsevekan' Antananarivo izy tamin' ny 3 Febroary 1994, toerana nohazoniny hatramin' ny 7 Desambra 2005, rehefa nisotro ronono noho ny taonany. Izy no nitarika ny Conférence épiscopale de Madagascar (Fiombonamben' ny Eveka eto Madagasikara) nanomboka ny tamin' ny taona 1997 ka hatramin' ny taona 2002.

Kardinaly

Nataon' i papa Joany Paoly II ho kardinaly izy tamin' ny 26 Nôvambra 1994, nitondra ny anaram-boninahitra hoe kardinaly-pretra Santi Silvestro e Martino ai Monti. Nodimandry tany Mahajanga izy ny tamin' ny Asabotsy 9 Janoary 2010.

Jereo koa

• Eglizy Katôlika Apôstôlika Rômanina eto Magadasikara

• Jérôme Louis Rakotomalala - kardinaly no teo alohany
• Tsarahazana Désiré - kardinaly androany