Afindrafindrao

Avy amin'i Wikipedia
Sauter à la navigation Sauter à la recherche

Ny afindrafindrao dia dihy malagasy vokatry ny fakan-tahaka ny dihy vazaha atao hoe quadrille izay dihiezina amin'ny mozika malagasy, matetika tanterahin'olo-maro mandeha tsiroaroa, lahy sy vavy, ka ny vavy eo aloha fa ny lahy ao aoriana mihazona ny tanan'ny vavy toa mampiana-mandeha azy. Tamin'ny vanimpotoana faha mpanjaka dia dihin'ny tandapa ny afindrafindrao, ankehitriny ny lanonan'ny Malagasy lazaina fa "mahalala" rehetra dia tsy maintsy manomboka amin'ny afindrafindrao,na eto Madagasikara na any ivelany.  

Ny zavamaneno ampiasaina indrindra tamin'izany fotoana izany dia ny angorodao sy ny harmonia.

Tantara[hanova | hanova ny fango]

Tamin'ny taonjato faha-19, tamin'ny fahatongavan'ny Eorôpeana dia nandray ny kolontsain'ireo vahiny ireo ny Malagasy nefa tsy nanary ny kolontsainy fa nampifangaro ny singa sasany amin'izany. Amin'ny lanonana toy ny Alahamadibe no nanehoan'ny Vazaha dihy vovao (atao hoe quadrille) izay nalain'ny Malagasy tahaka ka izany no lasa dihy afindrafindrao. Taty aoriana dia tsy ny saranga ambony ihany no nandihy afindrafindrao fa ny vahoaka iray manontolo tao Imerina. Nandritra ny fanjanahantany dia tsy dia nisehoseho loatra ny mpandihy afidrafindrao. Ny kolontsaina tian'ny mpanjanaka hanjaka tamin'izany dia ny an'ny Frantsay. Na dia teo aza izany fanjakan'ny kolontsaina tandrefana izany dia tsy nanjavona ny afindrafindrao fa niery tany ho any. Hany ka tamin'ny fahazoan'ny Madagasikara ny fahaleovan-tena dia ny afindrafindrao no lasa dihy fanokafana ny ankamaroan'ny lanonana.

Fandihizana ny afindrafindrao[hanova | hanova ny fango]

Izany dihy izany dia tanterahin'olon-droa lahy sy vavy, mampidoladola loha ankavia sy ankavanana. Alefa miankavia avy eo miankavanana manaraka gadona ny tongotra havia sy havanana, ny vehivavy eo aloha fa ny lehilahy avy ato aoriana mihazona ny tanan'ny vehivavy, toa mampiana-mamindra zazakely. Maro ny mpandray anjara miaraka ka manao lahara-manjohy lava miendrika faribolana. Ny mozika dihizina amin'ny afindrafindrao dia mitovitovy amin'ny mozika fandihizan'ny Betsimisaraka. Tsy ny lanonana rehetra mantsy no anaovana io dihy io. Amin'ny forazaza sy ny famadihana ary ny fandevenana, ohatra, dia dihy hafa no atao fa tsy ny afidrafindrao.

Ohabolana sy fitenenana[hanova | hanova ny fango]

  • Na dia eo aza ny akanga tsara soratra, ny afindrafindrao tsy azo avela.