Tontolo Kristiana

Avy amin'i Wikipedia
(tonga teto avy amin'ny Tontolo kristiana)
Kristianisma - Isanjaton' ny mponina isam-pirenena (taona 2914)

Ny Tontolo Kristiana ara-tantara dia manondro ny fanjakana kristiana sy ny firenena ahitana Kristiana maro anisa ary ny firenena anjakan' ny kristianisma na mifandray amin' ny kolontsaina kristiana.

Hatramin' ny nielezan' ny kristianisma avy any Ampiposahana ka hatrany Eorôpa sy Afrika Avaratra nandritra ny Empira Rômana tany am-boalohany, dia nizarazara ny Tontolo Kristiana tany amin' ny Atsinanana Grika sy Andrefana Latina efa nisy taloha. Noho izany dia nisy endrika samihafan' ny fivavahana kristiana nipoitra niaraka tamin' ny finoany sy ny fanaony manokana avy, nanana ny foibeny manodidina ny tanànan' i Rôma (dia ny kristianisma tandrefana, izay nantsoina hoe Tontolon' ny kristianisma tandrefana na Tontolon' ny kristianisma latina ny fianakaviambe kristiana ao aminy) sy Kônstantinôpla (ny kristianisma tatsinanana, izay nantsoina hoe Tontolo kristiana tatsinanana ny fianakaviambe kristiana ao aminy). Nanomboka tamin' ny taonjato faha-11 ka hatramin' ny taonjato faha-13, ny Tontolo kristiana latina dia nitana toerana ivon' ny tontolo tandrefana. Ny tantaran' ny Tontolo Kristiana dia naharitra 1 700 taona eo ho eo ary ahitana karazana fivoarana ara-tsôsialy sy ara-pôlitika, ary koa fandrosoana eo amin' ny zavakanto, ny maritrano, ny haisoratra, ny siansa, ny filôzôfia ary ny teknôlôjia.

Matetika ny hoe "Tontolo Kristiana" dia manondro ny Andro Antenatenany sy ny vanim-potoana môderna tapany voalohany izay nanehoan' ny Tontolo Kristiana hery ara-jeôpôlitika nifandona tamin' ny paganisma ary indrindra ny Tontolo Mozilmana.