Latina (vahoaka)

Sarintanin' ny fiteny tany Italia tamin' ny Andron' ny Vy: ny fiteny latina dia manana faritany kely eo anelanelan' ny fiteny etroska sy ny fiteny ombriana ary ny fiteny faliska.

Ny Latina dia vahoaka italika tao amin' ny faritr' i Latioma (Latium) nandritra ny vanim-potoan' i Rôma taloha, izay niteny amin' ny fiteny latina. Vondrom-poko ara-piteny any atsimon' ny ony Tiber na Tevere ny Latina, izay tsy nanana soratra talohan' ny taonjato faha-8. Niraisan' izy ireo ny fanompoam-pivavahana maro, toy ny fivavahana amin' i Jopitera latina teo amin' ny Tendrombohitra Albano. Nonina tanaty vondrom-piarahamonina an-tanàna kely maro ny Latina, tao amina fiarahamonina mpiompy andiam-biby fiompy, satria iharan' ny tondra-drano matetika ny tany.