Fanambadiana
Ny fanambadiana dia firaisana eo amin' ny olona roa na maro atao hoe mpivady, izay matatika lehilahy iray sy vehivavy iray. Izany dia toy ny fifanarahana. Matetika dia mankalaza ny fanambadiany ny olona. Ny lanonana dia matetika antsoina hoe fampakaram-bady. Ao amin' ny fiarahamonina nentim-paharazana, ny safidin' ny mpivady dia matetika fehezin' ny havany. Ny zo sy ny adidin' ny mpivady dia fehezin' ny fomba amam-panao ary napetraka mandritra ny fifamofoana vokatry ny fifanarahana teo amin' ny havan' ny mpivady.
Ny fanambadiana dia firaisana ara-pifanarahana na ara-pombafomba, maharitra tsy misy fetra, na voafetra na tsy voafaritra, ekena sy fehezin' ny fitsipika ara-dalàna na ara-pivavahana izay mamaritra ny fepetra fanatanterahana sy fiainana azy. Ny hoe fanambadiana dia manondro ny lanonana ara-pomba sy ny firaisana aterak' izany. Iray amin' ny sehatra mametraka ny rafitry ny fianakaviana eo amin' ny fiarahamonina izany.
Miovaova ny endriky ny fanambadiana arakaraka ny fiarahamonina heverina, ary indraindray izany dia miovaova koa na ao anatin' ny fiarahamonina iray ihany aza. Ny fanambadiana arakaraka ny fiarahamonina dia tsy mitovy raha ny fiantraikany no jerena (zo sy adidy eo amin' ny mpivady, fepetra fisarahana, fiombonan-trosa, sns.), na ny fepetra takiana amin' ny olona hivady mba ho azo tanterahina ny fanambadiany (fahafahan' ny mitovy fananahana hivady, fanambadian' ny tsy mitovy saranga na tsy mitovy fivavahana, fanambadiana indray, fanambadian' ny taranak' olon-tokana, fanambadiana tsy an-tsitrapo) na ny fiantraikany eo anatrehan' ny lalàna (fahafahana manangana anaka, fampihantonana ny zo ara-dalàn' ny iray amin' ny mpivady). Arakaraka ny kolontsaina dia tsy mitovy ny toetran' ny fanambadiana raha jerena ny fizotran' ny fankalazana azy na ny tsy fisian' izany, na raha jerena ny tandindona mifandraika amin' ny fanatanterahana azy (ara-pivavahana na ara-panjakana, fanambadian' ny mifankatia, fanambadiana arindra na fanambadiana sandoka, sns.), na ny fiantraikany ara-piarahamonina (fifandraisan' ny fianakaviana roa tonta) na, mifanohitra amin' izany, ny fanambadiana mifantoka fotsiny amin' ny mpivady (fanambadiana tsy dia misy fidirana an-tsehatry ny besinimaro).
Ny maha zava-dehibe ny fanambadiana dia samy hafa ihany koa arakaraka ny fiarahamonina, indrindra fa miankina amin' ny fisian' ny karazana firaisana hafa na ny tsy fisian' izany (fanambadiana malalaka, fanambadiana ara-panjakana), amin' ny endrika sy ny halehiben' ny faneken' ny fiarahamonina ireo fomba fiaina tsy ara-dalàna ireo.
