Diana (andriamanibavy)
I Diana dia andriamanibavy tao amin' ny fivavahana rômana sy helenista, izay heverina ho mpiaro ny faritra ambanivohitra sy ny natiora, ny mpihaza, ny bibidia, ny fiterahana sy ny fananahana (amin' ny maha andriamanitra reny azy), ny sampanan-dalana, ny fiandrianana, ny ny alina ary ny Volana. Ny toerana masina indrindra ao Ariccia (ao Italia ankehitriny) no foiben' ny kônfederasiôna latina talohan' ny nanjakan' i Rôma taminy. Nalaky lasa andriamanibavin' ny fihazana sy ny Volana amin' ny fedrà rômana izy, taorian' ny nampifangaroana azy amin' ny andriamanibavy Artemisy (Artemis) tao amin' ny panteôna grika nandritra ny lekisternio tamin' ny taona 399 tal. JK.
Mitovy amin' ny andriamanibavy grika Artemisy izy, ary nandray ny ankamaroan' ny fedrà momba an' i Artemisy tany am-piandohan' ny tantaran' ny Rômana, anisan' izany ny nahaterahany tao amin' ny nosy Delos avy amin' ny ray aman-dreny Jopitera (Jupiter) sy Latôna (Latona), ary i Apôlôna (Apollon) anadahy kambana aminy, na dia nanana fiaviana mahaleo tena tany Italia izy.
Heverina ho andriamanibavy virjiny sy mpiaro ny fiterahana i Diana. Ara-tantara, i Diana dia namorona triada miaraka amin' andriamanitra rômana roa hafa: Egeria (Egeria) ilay nimfa an-drano, mpanompony sady mpanampy mpampivelona; sy i Virbiosy (Virbius), andriamanitry ny ala.
I Diana dia tompoina ao amin' ny neôpaganisma, anisan' izany ny neôpaganisma rômana, ny stregeria ary ny vikà. Tamin' ny Andro Taloha sy tamin' ny Andro Antenatenany ary ankehitriny dia noheverina ho andriamanitra telo sosona i Diana, mitambatra amin' ny andriamanibavin' ny Volana (Luna na Selene) sy ny tontolo ambanin' ny tany (amin' i Hekate, araka ny mahazatra).