Vorombola
Ny vorombola dia vorona samihafa ao amin' ny fianakaviana Phasianidae, voasokajy ao amin' ny vondron-karazana Pavo sy Afropavo izay samy ao amin' ny foko Pavonini. Mifandray akaiky amin' ny akanga àry ny vorombola. Ny vorombola manga (Pavo cristatus) any amin' ny Zana-kôntinanta Indiana sy ny vorombola maitso (Pavo muticus) any Azia Atsimo-Atsinanana no karazana aziatika roa. Ny karazana fahatelo, vorombola kôngôley (Afropavo congensis), dia tsy hita raha tsy ao amin' ny Lemak' i Congo ao Afrika Afovoany. Ankoatra ny Pavo cristatus (vorombola manga) izay nompiana efa ela dia atahorana ho lany tamingana amin' ny taonjato faha-21 ny karazana hafa.
Fantatra amin' ny antsony maranitra sy ny volony midoroboka sy mivelara be ny vorombola lahy. Misongadina indrindra ity volony ity ao amin' ny karazana aziatika, izay manana "rambo" misy volom-borona miafina misy toa sary maso betsaka, izay tsy asehony raha tsy amin' ny fotoana fitadiavany vavy. Ny volom-borona manaitra ao amin' izy ireo no mampalaza azy ao amin' ny kolontsaina sy ny zavakanto.
Iadian' ny mpahay siansa hevitra ny tena asan' ny loko manjelatra toa metaly sady be pitsiny sy ny "rambony". Nanolo-kevitra i Charles Darwin fa natao hisarihana ny vavy ireo, ary nivoatra tamin' ny alalan' ny fifantenana ara-pananahana ny toetra mampiavaka ny lahy. Vao haingana dia nanolo-kevitra tao amin' ny foto-pitsipiky ny fahasembanana novolavolainy i Amotz Zahavi fa ampiasain' ilay vorona ho famantarana azo antoka momba ny fahatanjahany ireo toetra ireo, satria sahirana noho ny fahasarotan' ny fiainany miaraka amin' ny entana lehibe sy miharihary toa io ny lahy tsy dia afaka manao izany.