Macau
I Macau dia faritra ara-pitantanana manokana ao amin' ny Repoblika Entim-Bahoakan' i Sina nanomboka tamin' ny 20 Desambra 1999. Teo aloha, i Macau dia nozanahina sy notantanan' i Pôrtogaly nandritra ny efajato taona mahery ary heverina ho tobim-barotra farany sy zanatany eorôpeana farany tany Sina sy Azia. Ny isan' ny mponina ao aminy dia 683 700 tamin' ny faran' ny taona 2023, ary Sinoa ny ankamaroan' ny mponina.
Atao amin' ny fomba ôfisialy hoe Faritra ara-pitantanana manokan' i Macau ao amin' ny Repoblika Entim-Bahoakan' i Sina, izy. Izany dia atao amin' ny teny pôrtogey hoe Região Administrativa Especial de Macau da República Popular da China. Amin' ny fanoratana ny teny sinoa nentim-paharazana izy dia atao hoe 澳門; fa amin' ny fanoratana ny teny sinoa notsorina kosa dia 澳门 ; amin' ny pinyin izany dia soratana hoe àomén; fa amin' ny kantôney Jyutping dia ou3mun4 na ou3mun2.
Nanomboka tamin' ny tapaky ny taonjato faha-16 ny namoronana an' io faritra io, fony zanatany sy nofehezin' ny Pôrtogey tsikelikely i Macau. Nitondra fandrosoana haingana teo amin’ ilay faritra ny Pôrtogey, ka nahatonga azy ho tanàna lehibe sy mpanelanelana lehibe teo amin' ny raharaham-barotra teo amin' i Sina sy i Eorôpa ary i Japôna, ka nahatratra ny fara tampony tamin' ny faramparan' ny taonjato faha-16 sy fiandohan' ny taonjato faha-17. Nanomboka tamin' ny taona 1887 i Sina dia nanaiky tamin' ny fomba ôfisialy ny fiandrianan' i Pôrtogaly sy ny fibodoany maharitra - amin' ny voalohany nandritra ny 99 taona - an' i Macau tamin' ny alalan' ny Fifanarahana Sinô-Pôrtogey tao Beijing, iray amin' ny fifanarahana tsy mifandanja nosoniavina teo amin' ireo fahefana imperialy tandrefana sy ny empira voazanaka any Atsinanana Indrindra. Tamin' ny taona 1967, taorian' ny savorovoro tamin' ny 3 Desambra 1966 nataon' ny Sinoa mpanohana ny kôminista nipetraka tao Macau, dia nandao ny fibodoana azy i Pôrtogaly. Tamin' ny taona 1987, taorian' ny fifampiraharahana teo amin' i Pôrtogaly sy i Sina, dia nifanaiky ny firenena roa tonta fa haverina amin' ny fiandrianan' i Sina i Macau amin' ny 20 Desambra 1999. Amin' izao fotoana izao dia mitombo haingana ny toekaren' i Macau, fitomboana mifototra amin' ny fampiroboroboana matanjaka amin' ny fizahan-tany sy ny filokana vola. Ny vola maty ampihodinana kazinô any dia avo efatra heny noho ny any Las Vegas, izany no mahatonga an' i Macau anisan' ny tanàna manankarena indrindra eran-tany.
Nanomboka tamin' ny 20 Desambra 1999, ny anarana ôfisialin' i Macau dia "Faritra ara-pitantanana manokan' i Makau ao amin' ny Repoblika Entim-Bahoakan' i Sina". Taorian' ny nananganana ilay faritra, i Macau dia nofehezina araka ny foto-kevitry ny governemanta foibe ao amin' ny Repoblika Entim-Bahoakan' i Sina, izany hoe "firenena iray, rafitra roa", sy "fitondran' ny vahoakan' i Macau an' i Macau" miaraka amin' ny "ambaratongam-pizakan-tena ambony", ka mahazo tombony amin' ny fananana fitondrana manokana, mitovy amin' ny an' i Hong Kong. Noho izany, ny governemanta eo an-toerana no mitantana ny sehatra rehetra, afa-tsy ny fifandraisana amin' ny any ivelany sy ny fiarovana. Ny Repoblika Entim-Bahoakan' i Sina dia nanome antoka ny fikojakojana ny rafitra ara-toekarena sy ara-bola sy ny maha tsy manan-tsahala azy mandritra ny dimampolo taona farafahakeliny, izany hoe hatramin' ny 2049 farafaharatsiny.