Fiangonan' i Jesoa Marina

Ny Fiangonan' i Jesoa Marina na Tena Fiangonan' i Jesoa dia fikambanana kristiana iraisam-pirenena an' ny fiangonana pentekôtista onitariana ao Sina. Niorina niorina tany Beijing, any Sina tamin' ny taona 1917 izy io tamin' ny anarana hoe "International Reformed Jesus True Church", avy eo dia nantsoina hoe "True Jesus Church" (TJC) tamin' ny taona 1914, izay azo adika amin' ny teny malagasy hoe "fiangonan' i Jesosy marina". Amin' ny teny sinoa izy dia atao hoe : 真耶穌教會 / Zhēn Yēsū jiàohuì. Izy io dia anisan' ny fiangonana teratany sinoa telo izay nisy talohan' ny nahatongavan' ny Antoko Kômonista teo amin' ny fitondrana tany Sina tamin' ny taona 1949. Niainga avy tamin' ny sampana pentekôtista ao amin' ny fivavahana kristianina, ary avy tao Sina izy. Atao hoe 真耶穌教會 / Zhēn Yēsū jiàohuì ity fiangonana ity amin' ny teny sinoa fa True Jesus Church kosa amin' ny teny anglisy, nefa nantsoina hoe International Reformed Jesus True Church izy tamin' ny 1914, fotoana nananganana azy. Ny pasitera Yung-Ji Lin no voafidy ho mpitandrina hitantana ily fiangonana ankehitriny. Ity fiangonana ity dia milaza amin' ny fomba ôfisialy fa manana ny mpino 1,5 tapitrisa any amin' ny firenena iraika amby enimpolo eran' ny kôntinanta enina.

Foto-kevi-dehibe dimy

Ireto no foto-kevi-dehibe dimy iorenan' ny Fiangonan' i Jesoa Marina:

Fanahy Masina

Ny fandraisana ny Fanahy Masina, izay miseho ivelany amin' ny alalan' ny fitenenana amin' ny fiteny tsy fantatra, no ahazoana antoka ny fandovàna ny Fanjakan' ny Lanitra (Rômana 8:16; Efesiana 1:13-14).

Fanaovam-batisa

Ny batisan' ny rano no sakramenta famelan-keloka. Eny amin' ny toerana ahitana rano velona toy ny renirano na ny ranomasina no anatanterahana izany. Ny mpanao batisa, izay efa vita batisa sady efa nandray ny Fanahy Masina ihany koa, dia manao batisa amin' ny anaran' ny Tompo Jesoa Kristy. Ilay olona atao batisa kosa dia tsy maintsy alentika manontolo any anaty rano, miondrika ny lohany ary ny tarehiny no ambany (Jaona 3:5; Matio. 3:16; Asan' ny Apôstôly 2:38, 10:48).

Fanasàn-tongotra

Ny sakramentan' ny fanasan-tongotra no ahafahan' ny olona anankiray miray amin' ny Tompo Jesoa. Ilaina ihany koa io mba hampahatsiahy mandrakariva fa ilaina foana ny fitiavana, ny fahamasinana, ny fanetren-tena, ny famelan-keloka ary ny fanampiana ny hafa. Izay mandray ny batisa amin' ny rano dia tsy maintsy sasana amin' ny anaran' i Jesoa Kristy koa ny tongony. Afaka tanterahina ihany koa ny fanasan-tongotra faobe amin' ny fotoana maha-mety izany (Jaona 13:1-7).

Fanasan' ny Tompo

Ny fandraisana ny Fanasan' ny Tompo no sakramenta ahatsiarovana ny nahafatesan' i Jesoa Kristy. Andraisana ny nofo sy ny ran' ny Tompo izany sady ahafahana miray aminy mba hananana ny fiainana mandrakizay sy mba hatsangan-ko velona amin' ny Andro Farany. Tokony hatao matetika araka izay tratra io sakramenta io. Iray tokana ihany ny mofo tsy misy masirasira sy ny ranom-boaloboka ampiasaina amin' izany (1Kôrintiana 10:17, 11:26; Jaona 6:53; Marka 14:24-25).

Andro Sabata

Ny andro Sabata, izay andro fahafito amin' ny herinandro (Asabotsy), dia Andro Masina, voatahy sady nohamasinin' Andriamanitra. Hajaina izany amin' ny alalan' ny fahatsiarovana ny famoronan' Andriamanitra izao tontolo izao sy ny famonjeny azy ary amin' ny fanantenana ny fiadanana mandrakizay ho avy (Fiandohana 2:2-3; Hebreo 4:9-11)

Fototra folon' ny finoana

Taty aoriana, tamin' ny taona 1980 dia niampy ireo foto-kevi-dehibe ireo ka nanjary lasa fototra folon' ny finoana:

I Jesoa

I Jesoa Kristy, ilay Teny tonga nofo, dia maty teo amin' ny hazo fijaliana ho famonjena ny mpanota, natsangana ho velona tamin' ny andro fahatelo ary nakarina ho any an-danitra. Izy no hany Mpamonjy izao tontolo izao, Mpamorona ny lanitra sy ny tany, ary Tena Andriamanitra Tokana. (1 Timôty. 3:16; 1 Kôrintiana. 15:3-4; Asan' ny Apôstôly 4:12).

Ny Baiboly

Ny Baiboly Masina, fitambaran' ny Testamenta Taloha sy ny Testamenta Vaovao, izay tenin' Andriamanitra, no hany ahitana ny fahamarinana sady marina, ary fototry ny fiainana kristianina. (2 Timôty. 3:16).

Famonjena

Omen' Andriamanitra am-pitiavana amin' ny alalan' ny finoana ny Famonjena. Ny fiankinan' ny mpino amin' ny Fanahy Masina no hahafahany manana ny fahamasinana, manome voninahitra an' Andriamanitra ary mitia ny olona manontolo (Efesiana. 2:8).

Ny Fiangonana

Ny Fiangonan' i Jesoa Marina, naorin' ny Tompo Jesoa Kristy, tamin' ny alalan' ny Fanahy Masina nandritra ny "fara-orana", no tena fiangonana nitsangana avy tamin' ny Fiangonana tamin' ny andron' ny Apôstôly (Jôela 2:23; Amôsa 9:11).

Ny Fiaviana Faharoa

Ny Fiavian' ny Tompo Faharoa dia hiseho amin' ny Andro Farany rehefa hidina avy amin' ny lanitra Izy hitsara izao tontolo izao: ny marina handray ny fiainana mandrakizay, ary ny mpanota kosa ho voaozona mandrakizay (Matio 25:31-34; 1 Tesalôniana. 4:16-17).

Ity no dikan-teny malagasy, dika malalaka avy amin' ny teny anglisy, ary io dika amin' ny teny anglisy io kosa dia neken' ny fivoriambe fahasivy an' ny Tena Fiangonan' i Jesoa Marina, natao tamin' ny volana Mey 2005.

Finoana hafa

Ity fiangonana ity dia tsy mankalaza ny Krismasy, satria ny 25 Desambra, hoy ny fampianarany, dia fomba jentilisa fankalazana ny nahaterahan' ny Masoandro, ary natsofoka teo amin' ny fiangonana kristianina hafa nandritra ny nanjakan' i emperora rômana Kônstantino I tamin' ny taonjato faha-4 taor. J.K. Ambarany koa fa i Jesoa dia tsy nibaiko velively ny mpianany hankalaza ny fahaterahany.

Tsy ankalazaina ihany koa ny Zoma masina satria aminy dia fety jentilisa koa no fotony.

Jereo koa

Pentekôtisma onitariana