Anne Frank

Avy amin'i Wikipedia
Hanketo: Fikarohana, karohy

Annelies Marie Frank no tena anarany, teraka tamin'ny 12 Jiona 1929 tao Franckfort/Main, Alemaina, zanak'i Otto Heinrich Franke sy Edith Hollander. Margot no anaran'ny zokiny vavy.

Manaraka ny finoana ebreo ny fianakaviana Franke, ka nony niakatra teo amin'ny fitondrana i Adolf Hitler tamin'ny 1933, ka nanomboka ny fanenjehana ny jiosy, dia nanomboka natahotra izay hanjo azy izy ireo ka nisintaka tany Aachen, tany amin'ny renin'i Edith.

Tamin'ny 1934 dia nahazo asa tany Amsterdam, renivohitr'i Olanda i Otto ka nanorim-ponenana tao Mervedplein, somary ambanivohitr'i Amsterdam izy ireo.

Saingy ny volana mey 1940 dia tafiditra tao Olanda i Alemaina ary vao mainka nafana ny fanenjehana ireo Jiosy.

Nahazo fiantsoana hiseho any amin'ny birao mikarakara ny fifindra-monina jiosy (Zentralstelle fuer juedische Auswanderung) i Margot ny volana Jolay 1942 momba ny famindrana azy any amin'ny toby hiasany. Saingy i Otto dia efa niomana ny amin'ny hiavian'io andro iray io ka efa nanamboatra toerana hanafenana ny fianakaviany, izay tsy taiza fa tany amin'ny rihana ambony, ambadiky ny birao iasany. "Annexe" no niantsoan-drizareo azy io, ka ny 16 Jolay 1942 izy ireo no nanomboka niafina tao, rehefa mody navela nikorontana ny trano fonenany, hampisehoana fa tena lasa tampoka izy ireo, ary Otto mody namela taratasy kely nilaza fa ho any Soisa. Mbola nisy fianakaviana roa hafa tonga niara-niafina tamin'izy ireo tao tamin'izany.

Saingy ny 4 Aogositra 1944 rehefa nisy namadika ka nanoro ny fisian'ny "Annexe", dia tonga ny Gestapo nisambotra azy ireo.

Mbola nalefa tao Westerbork aloha izy ireo, toby fandalovan'ireo jiosy rehetra niafina kanefa tratra ka voaheloka hanao asa mafy satria mitovy lanja amin'ny jiolahy, ka ny 3 septambra dia nalefa tany Auschwitz. Ny antsak'izy ireo dia zaza latsaky ny 15 taona, ka tonga dia novonoina tany amin'ny efitranon'entona mahafaty, fa i Anne kosa izay efa nihoatra 3 volana ny faha-15 taonany dia tsy tao anatin'izany.

Ny 28 Oktobra izy ireo no nalefa tany Bergen-Belsen, fa i Edith kosa tavela tao Auschwitz. Ny volana martsa 1945 - roa volana talohan'ny nanafahan'ny tafika anglisy ny toby - dia nisy areti-mifindra typhus niparitaka ka nahafaty olona tokony ho 17.000 teo ho eo, ka anisan'izy ireo i Anne sy Margot.

Taorian'ny ady dia noheverina fa tamin'ireo jiosy tokony ho 110.000 tao Olanda ka nentina tany amin'ireo toby fampijaliana sy fanaovana asa mafy, dia 5000 eo ho eo no tafavoaka velona.