Zavamaneno misy tadiny
Ny zavamaneno misy tadiny na kôrdôfônina dia zavamaneno mamoaka feo avy amin'ny fihovitrovitry ny tady iray na maromaro eny aminy, kasihina, kitihina na velesin'ny mpitendry zavamaneno amin'ny rantsan-tanany mivantana na amin'ny alalan'ny fampiasana fitaovam-pikasohana na fikitihana na fivelezana.
Efa arivo taona maro ny tantaran'ny zavamaneno misy tadiny. Ny voalohany angamba dia zavamaneno tsy nanana afa-tsy tady tokana, sahala amin'ny jejilava. Efa fantatra hatrany Ejipta fahiny ny mpilalao harpa. Tamin'ny Andro Antenatenany dia nampiasa karazana valiha, sns ny mpitendry mozika.
Ny mpitendry zavamaneno dia milalao zavamaneno misy tadiny, toy ny gitara, amin'ny fikitihana ny tady amin'ny rantsantanany na amin'ny zavatra hafa, ary ny zavamaneno hafa amin'ny fivelezana ny tady amin'ny alalan'ny tantanana hazo maivana na amin'ny fikasohana ny tady amin'ny fitaovana mitovy endrika amin'ny tsipìka atao hoe fikasohana, ka anisan'ireo zavamaneno ireo ny lokanga. Amin'ny zavamaneno misy kitendry sasany, toy ny klavesinina dia manindry ny kitendry izay mikitika ny tady ny mpitendry. Mamoaka feo amin'ny alalan'ny fikapohana ny tady ny zavamaneno hafa.
Raha mampiasa zavamaneno kasohin-tadiny (lokanga) ny mpitendry zavamaneno dia misintona na mampandroso ny fikasohana izay vita amin'ny vombon-tsoavaly nohosorana karazana ditin-kazo (hazo kesika indrindra), eo amin'ny tady, ka mahatonga azy ireo hihovitrovitra. Raha mampiasa viela kosa ilay mpitendry dia manodina kodia izay mikasoka amin'ny tady ny sisiny nohosorana ditin-kazo.
Zavamaneno ampiasana fikasohana ny andian-javamaneno misy tadiny ao amin'ny ôrkesitra amin'ny mozika klasika tandrefana (fianakavian-dokanga) sy zavamaneno maro hafa (ohatra ny viôla (altô) sy ny gamba (na viôla da gamba) nampiasaina tamin'ny mozika tany am-boalohany tamin'ny mozikan'ny Vanim-potoana Barôka sy ny viôlinina nampiasaina tamin'ny karazana mozikam-poko na firenena maro). Azo kitihina amin'ny rantsantanana ihany koa ny zavamaneno rehetra misy tadiny ampiasana fikasohana, izany teknika izany dia antsoina hoe "pizzicato". Teknika isan-karazany no ampiasaina hampanenoana ny gitara elektrika, ao anatin'izany ny fikitihana amin'ny hohon-tanana na amin'ny alalan'ny plektra, sns.
Tena kitihina ny zavamaneno misy tadiny sasany, anisan'izany ny harpa sy ny gitara beso elektrika. Ohatra hafa koa ny sitara, ny rebaba, ny banjô, ny mandôlinina, ny okolele, ary ny bozoky.
Ao amin'ny rafitra Hornbostel-Sachs amin'ny fanasokajiana zavamaneno, ampiasaina amin'ny ôrganôlôjia, dia antsoina hoe kôrdôfônina ny zavamaneno misy tadiny. Izao no nolazain'i Sachs,
Ny kôrdôfônina dia zavamaneno misy tadiny. Mety hokapohina amin'ny hazokely ny tadiny, hokitihina amin'ny rantsantanana tsy misy fitaovana na amin'ny plektra, ampiasana fikasohana na (amin'ny harpa eôliana, ohatra) tsofina amin'ny rivotra. Ny hamaroana mahafanin'ny zavamaneno misy tadiny dia azo avondrona ho karazana fototra efatra: sitara, liota, lira ary harpa[1].
Amin'ny ankabeazan'ny zavamaneno misy tadiny dia miampita amin'ny vatan'ilay zavamaneno, izay matetika ahitana faritra poakaty na mihidy, ny fihovitrovitra. Mihovitrovitra koa ny vatan'ilay fitaovana sy ny rivotra ao anatiny. Mahatonga ny fihovitrovitry ny tady ho henon'ny mpitendry sy ny mpihaino kokoa ny fihovitrovitry ny vatan'ny zavamaneno sy ny lavaka na ny efitra voahidy. Poakaty ny vatan'ny ankamaroan'ny zavamaneno misy tadiny, mba hahazoana feo tsara kokoa. Ny sasany anefa - toy ny gitara elektrika sy ny zavamaneno hafa izay miantehitra amin'ny fanamafisam-peo elektrônika - dia mety manana vatana hazo mafy.
Jereo koa
[hanova | hanova ny fango]Loharano sy fanamarihana
[hanova | hanova ny fango]- ↑ Sachs, Curt (1940). The History of Musical Instruments. New York: W. W. Norton & Company. pp. 463–467. ISBN 9780393020687., p. 463.