Volom-borona
Ny volom-borona dia zavatra maniry avy amin' ny hoditra ka mandrakotra ny vatan' ny vorona sy ny dinôzôro sasany tsy vorona ary ny arkôsôro (Archosauria) hafa, izay rafitra tamba-tsela saro-drafitra vita amin' ny keratinina (sahala amin' ny volom-biby, ny kirana, ny hoho ary ny kitro), hita eo anelanelan' ny tontolo anatin' ireo biby ireo sy ny tontolo ivelany. Ny volom-borona izay miisa an' arivony dia miaro ny vatan' ny vorona amin' ny tontolo manodidina, indrindra amin' ny rano sy ny hatsiaka, ampiasainy amin' ny fanidinana, ary manome fiafenana ho azy. Ankoatra izany, ny lokony dia manampy amin' ny fifandraisana sy amin' ny fiarovana. Manana anjara asa amin' ny fiaraha-miaina sy amin' ny fananahan' ny vorona koa ny volom-borona. Nipoitra vokatry ny fampifanarahana amin' ny zava-misy ny volom-borona, izay azo inoana fa nanana anjara asa momba ny fandanjalanjana ny hafananana sy ny hatsiaka tao amin' ny dinôzôra. Ahafahana mamantatra ny karazany, ny lahy sy ny vavy, ny taonany ary ny fahasalamany ny fandinihana ny volom-borona na ny fitambarany. Anisan' ny mampiavaka ny vorona amin' ny biby hafa misy ankehitriny ny volom-borona. Na dia mandrakotra ny ampahany be amin' ny vatan' ny vorona aza ny volom-borona dia tsy maniry afa-tsy amin' ny toerana voafaritra tsara eo amin' ny hodiny ihany.
Ampiasain' ny olona hanaovan-javatra maro ny volom-borona: ara-pampiharana sy ara-kolontsaina ary ara-pivavahana. Sady malefaka no tena tsara amin' ny fitahirizana hafanana ny volom-borona, koa noho izany dia ampiasaina amin' ny fikarakarana fandriana avo lenta, indrindra amin' ny fanamboarana ondana sy lamba firakotra ary kidoro. Ny volom-borona koa dia atao sesika amin' ny fitafiana sy fitaovana fampiasa amin' ny ririnina toy ny palitao matevina sy kitapo fatoriana. Afaka mibontsina tsy misy toa azy ny volomalemy avy amin' ny vorona ao amin' ny fianakaviana Anatidae sasany (gisa) sy avy amin' ny vondron-karazana Somateria, izay mety miitatra avy amin' ny toetra nofisahina ka afaka mitahiry rivotra betsaka manana fahafaha-manefitra hafanana.
Nampiasaina sy mbola ampiasaina amin' ny fanamboarana penina volom-borona ny volon' ny vorona lehibe (ny gisa, matetika). Taloha dia nampidi-doza ho an' ny karazam-borona sasany sady nandray anjara amin' ny famongorana ny karazana hafa ny fihazana vorona hakana volom-borona fanao haingo. Amin' izao andro izao dia avy amin' ny fiompiana ny volom-borona ampiasaina amin' ny lamaody sy amin' ny satroka sy akanjo miaramila, anisan' ny ompiana ny akoho, ny gisa, ny vorontsiloza, ny karazana vorombola (Phasianidae) ary ny aotirisy. Lokoina sy amboarina mba hanatsarana ny bika aman' endriny ireo volom-borona ireo, satria matetika matroka raha oharina amin' ny volon' ny voron-dia.