Voan-kevitra
Ny voan-kevitra dia hevitra natao hanorenana ny foto-javatra sy ny fandinihana ary ny finoana izay mivaingana kokoa. Rehefa ampiharina amin' ny zavatra iray ny voan-kevitra dia afaka mamorona fehezankevitra. Ao amin' ny haifiteny, ny voan-kevitra dia maneho ny hevitry ny teny, fa ny teny no manondro izany voan-kevitra izany.
Ny voan-kevitra dia hevitra tsy azo tsapain-tanana izay miavaka amin' ny zavatra tondroina amin' ity hevitra ity. I Tômasy avy any Akoino tamin' ny Andro Antenatenany no nampiditra io teny hoe voan-kevitra" io ("conceptus", amin' ny teny latina) ary avy eo i William avy any Ockham sy ny filôzôfa skôlastika hafa. Avy amin' ny teny latinina hoe "conceptus" izay midika hoe "asa fitahirizana, fihazonana miaraka", "fandraisana", izay avy amin' ny matoanteny hoe "concipere" izay midika hoe "misaina".
Taty aoriana ny filôzôfa môderina toa an' i René Descartes sy i John Locke dia nanolo ny voan-kevitra amin' ny hoe "hevitra" (grika: ἰδέα / idéa), izay matetika manondro ny fanehoana an-tsaina rehetra, na tsapan' ny fitaovam-pandrenesana izany, na sary an-tsaina na tsy tsapan' ny fitaovam-pandrenesana.
Ny filôzôfa samy hafa dia tsy voatery hitovy hevitra ny amin' ny voan-kevitra iray. Ohatra, na dia matetika no adika ho hevitra ankapobeny ny voan-kevitra (ny voan-kevitra momba ny alika, ohatra, dia mampiray ny toetra iraisan' ny alika rehetra misy sy mety hisy), dia misy ny manome fandikana hafa: ao amin' i Gottfried Wilhelm Leibniz, indrindraindrindra, ny hevitra feno dia maneho ny sobstansan' ny tsirairay manokana ary tsy mifanaraka afa-tsy amin' izany ihany.