Syngonium podophyllum

Ny Syngonium podophyllum dia zavamaniry trôpikaly teratany any Amerika Afovoany sy Amerika Atsimo. Izy io dia zavamaniry tena tian' ny olona noho ny fikarakarana mora sy ny endriny izay tsara atao haingon-trano.

Famariparitana

Zavamaniry ao amin' ny fianakaviana Araceae. Zavamaniry mianika ny Syngonium podophyllum izay afaka mifikitra amin' ny tohana amin' ny fampiasana ny fakany an-drivotra. Raha maniry anaty trano izy dia mety hahatratra haavo 1 ka hatramin' ny 2 m raha asiana tohana.

Raviny

Ny ravin' ny Syngonium podophyllum dia mifandimby, sady izy ireo no tena manaitra indrindra ao aminy: miova miandalana ny endriky ny raviny. Miova eo amin' ny maintso tanora hatramin' ny maintso antitra ny lokony, matetika misy soritsoritra milokom-bolafotsy na fotsy. Miala amin' ny fandadiana mankany amin' ny fianihana ilay zavamaniry, mifanaraka amin' ny fisian' ny hazavana bebe kokoa amin' ny toerana ambony.

Dingana voalohany

Ao amin' ilay zavamaniry raha mbola tanora, ny raviny dia feno, manify, malama, ary miendrika zana-tsipìka na fo lavalava misy tendro maranitra, manana kirany afovoany voamarika tsara ny felan-draviny sady misy toa sofiny roa miavaka eo amin' ny fotony, mitovitovy amin' ny an' ny saonjo. Ity no endrika fantatra indrindra amin' ny Syngonium podophyllum maniry anaty tavy.

Dingana anelanelany

Rehefa mihalehibe ilay zavamaniry dia lasa lava kokoa ny tahony ary manomboka mianika. Lasa mivelatra kokoa ny raviny vaovao, ary miseho kokoa ny zana-pelana roa ambany ka lasa mizara telo ny ravina tsirairay. Manomboka mipoitra eo amin' ny sisiny ny triatra na ny fizaràna, toy ny felan-tanana misy rantsany telo.

Dingana farany

Rehefa tonga amin' ny fahalehibeazany ny Syngonium podophyllum (matetika afaka taona maromaro na rehefa miakatra eo amin' ny tohana izy, dia lasa mizarazara be ny raviny, indraindray mizara 5 ka hatramin' ny 9 miankina amin' ny kinovany. Mitovitovy amin' ny an' ny Philodendron na ny an' ny Monstera ireo ravina ireo amin' izany, ary lasa henjana kokoa sy maitso matroka kokoa.

Voniny

Ny Syngonium podophyllum dia tsy manana "voninkazo" amin' ny hevitr' io teny io mahazatra, fa vondrom-bony, sahala amin' ny karazan-javamaniry ao amin' ny fianakaviana Araceae, mitovy amin' ny an' ny Philodendron, ny an' ny Monstera na ny an' ny Anthurium. Ao amin' ny toeram-paniriany voajanahary, ny Syngonium podophyllum dia mamony indrindra amin' ny lohataona sy fahavaratra, rehefa mandrisika ny fitomboana ny fizaràn-taona mando.

Ny tena voniny, izay mitambatra betsaka, dia voafono ravina nivadika fantsona miloko manopy fotsy na maitso na somary mavokely, arakaraka ny fepetra nambolena azy. Miaro ny vony sady manintona ny bibikely mpamindra vovobony io ravina niova asa io.

Eo anivon' izany rehetra izany no misy toa tsanganam-baringarina be nofony. Ny tapany ambany amin' ity varingarina ity no misy ny fitambaran' ny vony lahy izay manana vovobony betsaka, fa ny tapany ambany kosa no misy ny vony vavy mpamokatra tsirivavy. Eo anelanelan' ireo ampahany roa ireo dia misy faritra tsy mamokatra izay manasaraka ny vony lahy sy ny vony vavy izay misorona ny fampananahan-tena.

Tahony

Malefaka nefa matanjaka ny tahon' ny Syngonium podophyllum, ka ahafahany mianika na hisandrahaka amin' ny tany. Mety mahatratra 1 ka matramin' ny 3 m raha anaty trano, fa mihoatra izany raha eny ivelany. Amin' ny ankapobeny dia maitso tanora ka hatramin' ny maitso antitra ny taho, indraindray misy loko mavokely amin' ny zana-kazo tanora. Ny fisandrahaky ny tahon' ilay zavamaniry dia mampitombo isa ny raviny sy mampitombo ny velarana azon' ny hazavana.

Ny tahony dia mamoaka faka an-drivotra izay ahafahany mifikitra amin' ny tohana toy ny tsato-kazo, ny rindrina, na ny hazo maniry. Azo atao ny mamokatra zava-maniry vaovao amin' ny alalan' ny fanatsatohana ampahany amin' ny taho misy tonony, izay fomba fanaparitahana mahazatra indrindra.

Fepetra fambolena azy

Ny hazavana tsy mivantana no tian' ny Syngonium podophyllum. Mahazaka alokaloka izy io nefa mahatonga ny raviny ho tsy dia miloko izany. Mitady mari-pana trôpikaly izy (hafanana 18--24°C) ary tsy mahazaka hatsiaka. Ny tany dia tokony hamandoina kely fa tsy mando loatra. Amin' ny ririnina dia ahena ny rano. Tany maivana, mifangaro tsara, be akora ôrganika no tsara. Azo atao ny mandrantsana azy mba hifehezana ny fitomboany isaky ny 1 na 2 taona.

Fampitomboana taranaka

Mora ny fampitomboana taranaka ny Syngonium podophyllum amin' ny fanatsatohana ny taho, matetika anaty rano na mivantana amin' ny fangaron-tany sy akora ôrganika anaty tavy. Mety tsara atao haingo izy raha volena anaty harona mihantona na avela hianika amin' ny tsato-kazo.

Toetrany manokana

Misy poizina ny faritra rehetra ao amin' ny Syngonium podophyllum, ka miteraka fanaintainana amin' ny vava sy mety hanapoizina raha voatelina. Tokony hitandrina ny tompon-trano aniriany na ny mpikarakara zaridaina amin' ny fangirifiriana mety hahazo hoditra vokatry ny ranon-javamaniry misy asidra ôksalika C₂H₂O₄ sy ny mety ho fahasimban' ny maso vokatry ny rafida (kristalin' ny ôksalata-na kalsiôma Ca(COO)₂ na karbônata-na kalsiôma CaCO₃ manify).

Jereo koa

Araceae

Syngonium