Slôvenia
I Slôvenia dia firenena ao Eorôpa Afovoany. Ny renivohiny dia i Ljubljana (vakio hoe: Liobliana). Ny tanàna lehibe indrindra dia ny renivohiny. Mirefy 20 273 km2 ny velaran-taniny ary miisa 2 055 496 ny mponina ao aminy araka ny fanisana natao tamin' ny taona 2012. Ny faritr' ora dia +1.
I Slôvenia dia firenena kely ao amin’ ny Saikanosy Balkana, eo anelanelan’ i Italia sy i Aotrisy sy i Hôngria ary i Krôasia. Manana morontsraka ao amin’ ny Ranomasina Adriatika izy. Be tendrombohitra ity firenena ity: ao no ahitana ireo tendrombohitra Alpa Slôvena. Firenena be ala koa i Slôvenia ka mbola ahitana linksa sy orsa (na bera) ary lopa.
Raha mbola tao amin’ ny Repoblika Entim-Bahoaka Federativan’ i Iogôslavia i Slôvenia dia izy no faritra nandroso indrindra niaraka amin’ i Krôasia. Izany firoboroboan’ ny toekarena izany dia nihamafy: ankehitriny dia izy no firenena manan-karena indrindra amin’ ireo firenena folo niditra ho mpikambana ao amin’ ny Vondrona Eorôpeana tamin’ ny taona 2004.
Nakambana tao amin’ ny Empira Rômana ny faritra misy an’ i Slôvenia izay nanaovan’ ny fokom-pirenena môngôly fananiham-bohitra, avy eo nidiran’ ny Slôvena izay vahoaka slava. Nanomboka tamin’ ny taonjato faha-13 no nanjakazakan’ ny dinastian’ ny Habsborga tao. Natanjaka ny fanindrahindràn-tanindrazana tamin’ ny taonjato faha-19. Taorian’ ny faharavan’ ny Empira Aostrô-Hongariana, taorian’ ny Ady Lehibe Voalohany, dia niorina ny fanjakà-mpanjaka niraisan’ ny Serba sy ny Krôaty ary ny Slôvena. Nanjary Fanjakan' i Iogôslavia izany tamin’ ny taona 1929, talohan’ ny hanjavonany tamin’ ny Ady Lehibe Faharoa. Tamin’ ny taona 1945 dia nanjary iray amin’ ireo repoblika enina nandrafitra ny Repoblika Entim-Bahoaka Federativan’ i Iogôslavia i Slôvenia: fanjakana kômonista notarihin’ i Tito izany. Taorian’ ny fahafatesan’ i Tito tamin’ ny taona 1980 dia samy nitaky ny fahaleovan-tenany avy ireo repoblika ireo. Nitombo izany fitakiana izany tamin’ ny taona 1989 nandritra ny faharavan’ ny fitondrana kômonista maro tao Eorôpa Afovoany. Tamin’ ny taona 1991 dia nanambara ny fahaleovan-tenany i Slôvenia, sahala amin’ i Krôasia koa, ary tsy ela dia nankatoavin’ ny fianakaviambe iraisam-pirenena izany. Marin-toerana ara-pôlitika amin’ izay ilay firenena sady niroborobo ny toekarenany izay nahafahany niditra ho mpikambana tao amin’ ny Vondrona Eorôpeana tamin’ ny taona 2004.
Jereo koa[hanova | hanova ny fango]
Firenena ao Eorôpa
Albania - Alemaina - Andôra - Aotrisy - Belzika - Bielôrosia - Bolgaria - Bôsnia-Herzegôvina - Danemarka - Espaina - Estônia - Fanjakana Mitambatra - Finlandy - Frantsa - Grisia (na Gresy) - Hôngria (na Hongaria) - Irlanda - Islandy - Italia - Jeôrjia - Kipra (na Sipra) - Krôasia (na - Krôatia) - Letônia - Liktenstaina - Litoania - Loksemborga - Masedônia Avaratra (na Makedônia Avaratra)- Malta - Môldavia - Môntenegrô - Nederlandy - Nôrvezy - Okraina - Pôlônia - Pôrtogaly - Tsekia - Romania - Rosia - San-Marîno - Serbia - Slôvakia - Slôvenia - Soeda - Soisa - Tsekia - Vatikàna.
Kôntinenta eto an-tany
