Risinina
Ny risinina dia glikôrôteinina sy poizina avy amin' ny zavamaniry vokarin' ny zavamaniry iray ao amin' ny fianakaviana Euphorbiaceae, ny kinana (Ricinus communis). Izy io dia heterôdimera misy rojo pôlipeptidika roa, ka ny rojo B dia lektinina fa ny rojo A dia miasa toy ny prôteinina tsy mampiasa ny ribôzôma (voa bitika mihizina). Ny fomba fiasany dia ahafahany mahafaty sela, izay mahatonga ny risinina ho anisan' ny akora misy poizina indrindra fantatry ny olombelona.
Ny salam-patran' ny risinina (LD50) mahafaty totozy dia eo amin' ny 5 µg/kg amin' ny lanjan' ny vatana isaky ny tsindrona anaty lalandra. Ho an' ny olombelona dia tombanana eo anelanelan' ny 1 ka sy 20 µg/kg amin' ny lanjan' ny vatana ny fatra mahafaty raha mitelina risinina (manodidina ny 5 ka hatramin' ny 10 voan' ny kinana).
Ny risinina dia heverina ho fitaovam-piadiana biôlôjika azo ampiasaina. Izy io dia nosokajian' ny CDC Atlanta ho "mpanao biôlôjika sokajy B" ary nosokajian' ny HHS ho "Select Agent" ("mpanao voafantina") sady voasoratra ao amin' ny tabilao 1A (Schedule 1) ao amin' ny Chemical Weapons Convention ("Fifanarahana momba ny Fitaovam-piadiana Simika"). Tranga maromaro momba ny fampiasana azy io ho poizina no voatatitra, fa ny tena nalaza indrindra dia ny famonoana ilay mpanao gazety bolgara Georgi Markov.