Mozika barôka
Ny mozika barôka dia vanim-potoan' ny mozika klasika tandrefana izay nipoitra niaraka amin' ny hetsika barôka tamin' ny taonjato faha-17 ary nivoatra hatramin' ny faran' ny taonjato faha-18. Mizara maromaro ny vanim-potoan' ny mozika barôka izay mirakitra karazana mozika samihafa, manomboka amin' ny mozikan-javamaneno ka hatramin' ny ôperà izay niandoha tamin' izany. Niely tamin' ny ampahany betsaka amin' i Eorôpa Andrefana ny mozika barôka, izay nahitana an' i Frantsa sy Italia, ary nisy akony miavaka tany amin' ny firenena jermanika. Anisan' ny mpamorona ny mozika klasika heverina ho sangany ankehitriny ny olo-malaza tao amin' ny mozika barôka toa an' i Johann Sebastian Bach, i Georg Friedrich Händel, i Marc-Antoine Charpentier, i Jean-Philippe Rameau, i Antonio Vivaldi, i Domenico Scarlatti, i Heinrich Schütz ary i Georg Philipp Telemann.
Miavaka ny mozika barôka noho ny fampitomboana ny firindram-peo sy ny fisian' ny "basso continuo", miaraka amin' ny fivoaran' ny angolam-peo ao anatin' ny sanganasa maro. Nanjaka ny karazana mozika sasany nandritra io vanim-potoana io ary nahitana sanganasa be dia be natokana ho an' ireo karaza-mozika irei, toy ny "cantata", ny "fuga" na ny "sonata", ary koa ny mozikam-pivavahana, izay nandalo fiovana lehibe. Fanampin' izay, zavamaneno maro no mifandray amin' io vanim-potoana io ary nandray anjara amin' ny fivoaran' ny karazana mozika nandritra ny tantarany, toy ny klavesinina na ny viôla da gamba. Ny mozika barôka dia niaina fifohazana ny fahalianana ary tena nipoitra indray nandritra ny taonjato faha-20, indrindra fa nahitana sehatra vaovao momba ny fikarohana mozika: fanehoana mozika nahazoana toromarika ara-tantara.