Menaka palma
Ny menaka palma dia menaka zavamaniry nalaina avy amin' ny nofom-boan' ny palmie fanaova-menaka (Elaies guineensis), hazo any Afrika trôpikaly izay ahazoana menaka palmista ihany koa izay azo avy amin' ny vihim-boany.
Noho ny vokatra mihoatra ny 50 tapitrisa taonina isan-taona dia io no menaka zavamaniry be mpampiasa indrindra eran-tany. I Indônezia sy i Malezia amin' izao fotoana izao no firenena mamokatra an' io voankazo io izay miantoka ny 85 % amin' ny famokarana. Kanonkanona nentim-paharazana amin' ny sakafo any amin' ny faritra sasany any Afrika Andrefana ny menaka palma, nefa tamin' ny taonjato faha-20 vao nanomboka ny famokarana azy any amin' ny faritra mafana any Amerika Atsimo sy any Azia. Amin' izao fotoana izao dia ampiasaina any amin' ny firenena tsy mamokatra izy io amin' ny fanamboarana sakafo voaova, manolo ny tavy avy amin' ny biby (dibera, sns.) sy ny menaka zavamaniry nasiana hidirôzenina io karazana menaka io.
.JPG)
Ny fisian' ny asidra matavy be dia be ao anatiny dia iharan' ny fanakianana momba ny fiantraikany amin' ny fahasalaman' ny olombelona noho ny antony maro. Ny voalohany dia momba ny asidra matavy ampoka izay tsy anisan' ny asidra matavy tena ilaina. Noho izany dia tsy tena ilaina amin' ny sakafon' olombelona izy ireo fa mahatonga hatavezana be loatra. Ny faharoa dia mahakasika ny fiantraikany mivantana amin' ny fahasalaman' ny olombelona. Ohatra, nanatsoaka hevitra tamin' ny taona 2015 ny fandravonana ny fanadihadiana ara-tsiansa rehetra navoaka momba io lohahevitra io fa misy fiantraikany ratsy amin' ny haavon' ny kôlesterôla, mitovy amin' ny an' ny tavin' ny biby, ny menaka palma, manakaiky ny an' ny tavy nasiana hidrôzenina, ary matanjaka kokoa noho ny an' ny menaka zavamaniry be asidra matavy tsy ampoka (ôliva, voanjo, sns.).
Ny fikambanana tsy miankina amin' ny fanjakana, amin' ny lafiny iray, dia manameloka ny fampandrosoana ny fambolena palmie fanaova-menaka, satria mitarika amin' ny fandripahana ala lehibe any Malezia sy any Indônezia ary any Papoazia-Ginea-Vaovao izany, ary tena loza mitatao ho an' ny karazam-biby maro miaina ao anatin' ireo ala ireo izay efa atahorana ho lany tamingana (tigra, rajako, sns). Na izany aza, mamokatra be dia be isaky ny hektara ny palmie fanaova-menaka raha mitaha amin' ny voly mpifaninana aminy (kôlza, tanamasoandro, sôzà), na dia betsaka aza ny asidra matavy tena ilaina ao amin' izy ireo. Raha soloina an' iretsy farany iretsy ny palmie fanaova-menaka, sady tsy ahena ny famokarana, dia hiteraka fandripahana ala bebe kokoa izany. Io habetsahan' ny vokatra io ihany koa no mahatonga azy ho menaka mora vidy indrindra.
Tamin' ny taona 2016 dia tatitra manameloka ny fampiasana zaza tsy ampy taona sy ny asa an-terivozona any amin' ny toeram-pambolena indôneziana ny Amnesty International.