Megidô

Avy amin'i Wikipedia
(tonga teto avy amin'ny Megido)

I Megidô dia tanàna tamin' ny Andro Taloha tao amin' ny faritr' i Palestina izay nisy olona tamin' ny faramparan' ny taonarivo faha-4 tal. J.K. hatramin' ny taona 350 tal. J.K. any ho any. Niitatra fatratra ilay tanàna noho ny toerana misy azy izay eo amin' ny lalana mampitohy an' i Egipta sy i Siria, atao hoe "Lalan' ny Ranomasina" (hebreo: דרך הים / Derekh HaYam).

Tamin' ny fiandohan' ny taonarivo faha-2 tal. J.K. dia azon' ny Amôrita, izay vahoaka siriana, ilay tanàna. Azon' ny farao Totmôsisy III tamin' ny Siriana ilay tanàna (taonjato hafa-15 tal. J.K.). Maro ny fandravana nahazo an' ilay tanàna, i Sôlômôna (na Salômôna) no nanamboatra azy indray taty aoriana ka nanisy azy manda lehibe. Nisy tonelina nampitohy azy amin' ny loharano avy any ivelany izay niantoka ny famatsian-drano raha misy fahirano. Notafihin' ny Asiriana sy nalainy i Megidô tamin' ny taona 753 tal. J.K., avy eo azon' ny Egiptiana koa tamin' ny taona 609 tal. J.K. (tamin' ny alalan' ny ady nifanaovan' ny farao Nekao II sy ny mpanjaka Jôsia izay maty tamin' izany) ary fotoana kely taty aoriana dia azon' ny Persiana koa.

I Megidô amin' izao fotoana izao dia tanàna miorina any amin' ny 40 km ao atsimo-atsinanan' ny tapany atsimon' ny Ranomasin' i Galilia (na Farihin' i Tiberiada), ao amin' ny lembalamban' ny renirano Kisôna ao Israely.

Jereo koa[hanova | hanova ny fango]