Main-tany
Ny main-tany na fizaràn-taona maina dia fizaran-taona mahambany ny rotsak' orana, indrindra any amin' ny faritra manana toetany trôpikaly (eo anelanelan' ny 15 sy 25 degre laharam-pehintany). Miovaovaova ny faharetany. Amin' ny ankapobeny dia mitombo izy io raha lavitra ny fehibe. Izy io dia miavaka noho ny hakelin' ny rotsak' orana, izay tsy voatery ho aotra. Manaraka azy ny vanin-taonan' ny orana na ny fizaràn-taona mando.
Anjakan' ny fehikibon' orana trôpikaly, avy any avaratra mankany atsimo ary mifamadika amin' izany koa, mandritra ny taona, ny toetrandro any amin' ny faritra trôpikaly. Ny fahavaratra sy ny ririnina any amin' ny faritra manana toetany antonony no mifanitsy amin' ny main-tany amin' ny faritra trôpikaly.
Fehikibon' orana
[hanova | hanova ny fango]Eo ho eo amin' ny Nôvambra ka hatramin' ny Marsa ny fehikibon' orana trôpikaly dia any amin' ny ila-bolantany atsimo; mandritra izany fotoana izany dia ao amin' ny vanim-potoan' ny main-tany izay misy rotsak' orana kely ny faritra trôpikaly avaratra, ary mazàna ny andro no ibaliahan' ny masoandro. Amin' ny volana Mey ka hatramin' ny Septambra dia any amin' ny ila-bolantany avaratra ny fehikibon' orana, ary ny faritra mafana any atsimo dia ao anatin' ny main-tany. Araka ny fanasokajiana Köppen, ho an' ny toetany trôpikaly dia volana manana salan-drotsak' orana latsaky ny 60 mm ny volana ao amin' ny main-tany.
Mipaka any avaratra hatrany amin' ny Zana-pehintany Asorotany ary hatrany atsimo amin' ny Zana-pehintany Adijady ny fehikibon' orana. Eo akaikin' ireo fehy ireo dia misy fizaràn-taona mando iray sy fizaràn-taona maina iray isan-taona. Ao amin' ny fehibe dia misy fizaràn-taona mando roa sy maina roa, satria mandalo indroa isan-taona ny fehikibon' orana, indray mandeha mianavaratra ary indray mandeha mianatsimo. Eo anelanelan' ny zana-pehintany sy ny fehibe dia mety hiaina fizaràn-taona mando fohy na fizaràn-taona mando lava be ny toerana samihafa; ary fizaran-taona maina fohy na fizaran-taona maina lava. Na na izany aza dia mety hanova tanteraka ireo lasitry ny toetany ireo ny jeôgrafia isan-toerana.
Hain-tany
[hanova | hanova ny fango]
Ambany dia ambany ny hamandoana amin' ny fizaràn-taona maina, ka ritra ny toerana misy rano sy ny renirano. Mety hahatonga ny biby mpiraoka ahitra maro hifindra monina any amin' ny toerana lonaka kokoa io tsy fahampian-drano io (sy ny tsy fahampian' ny sakafo). Ohatra amin' ireo biby ireo: ny zebra, ny elefanta, ny jirafa, ny lalomena (hipôpôtama), ny tokantandroka (rinôserôsy), ny antilôpa sy ny gno, ny bofalôn-drano, ny bofalô afrikanina, gaora, ny tapira, ny emeo, ny aotirisy, ny nando, ary ny kangoroa. Noho ny tsy fahampian' ny rano ao amin' ny zavamaniry dia mitranga matetika ny doro tanety (doro ala).
Aretina
[hanova | hanova ny fango]Mampiseho ny angon-drakitra fa aty Afrika dia mifanojo amin' ny fitomboan' ny trangan' ny kitrotro ny fiandohan' ny fizaràn-taona maina — izay heverin' ny mpikaroka fa mety ho vokatry ny habetsahan' ny olona mandritra ny fizaràn-taona maina, satria tsy azo atao ny asa fambolena raha tsy misy fanondrahana. Mandritra izany fotoana izany dia mifindra monina any an-tanàn-dehibe ny mpamboly sasany, ka mahatonga ny mponina hifanizina kokoa, ary mahatonga ny aretina hiely mora kokoa.