Ludia dracaenoides

Ny Ludia dracaenoides dia zavamaniry mamony, ao amin' ny fianalaviana Salicaceae. Miseho amin' ny endrika hazobotry na hazo madinika, manana haavo 15 metatra, ity zavamaniry ity. Teratany eto Madagasikara ity zavamaniry ity, izay hita any amin' ny ala mando trôpikaly, indrindra any amin' ny faritra avaratry ny Nosy (faritra Antsiranana / Analamera).

Amin' ny teny malagasy ity zavamaniry ity dia atao hoe harahara na haraharavavy. nefa manondro zavamaniry hafa koa ny anarana hoe "harahara" (Phylloxilon ensifolium sy Phylloxylon decipiens ary Phylloxylon perrieri). Nekena tamin' ny fomba ôfisialy amin' io anarany ara-tsiansa io ity karazana ity, ary nofaritan' i H. Perrier tao amin' ny Mémoires du Muséum d'Histoire Naturelle tamin' ny taona 1940

Fanoritsoritana

Maitso landava, mifandimby, tsotra, mafy ary feno ny ravin' ny Ludia dracaenoides. Mahazatra amin' ny vondron-karazana Ludia. ny kirany ambaratonga faharoa izay miseho tsara sy miakatra. Mitokana, lahy no vavy sady kely ny voniny, izay tsy misy felambony, misy ravimbony dimy na enina. Maro dia maro ny lahimbony. Misy akorany miendrika atody na boribory mirefy 1 ka hatramin' ny 1,5 sm eo ho eo ny voany. Misy vihy eo anelanelan' ny 3 sy 12 (manana savaivo manodidina ny 2 mm) ny voa tsirairay.

Fampiasana ilay zavamaniry

Ampiasaina eto Madagasikara amin' ny fanamboarana fitaovana fitoeran-javatra, toy ny lovia hazo sy ny maro hafa, ny hazon' ny Ludia dracaenoides. Karazana maro ao amin' ny vondrona Ludia no manana nofon-kazo mavesatra sy mateza, ampiasaina amin' ny fanorenana na atao fitaovana.

Satan' ny fitahirizana

Araka ny lisitry ny karazana Magnoliopsida ho an' i Madagasikara dia anisan' ny zavamaniry marefo fiainana ny Ludia dracaenoides, izany dia midika fa mety hihena ny velaran' ny toerana faniriany voajanahary.