Jodeo-kristianisma

Avy amin'i Wikipedia
Sauter à la navigation Sauter à la recherche

Ny jodeo-kristianisma dia fihetsiketsehana na fivavahana kristiana nipotra tamin'ny Jiosy mitandrina ny Lalàn'i Mosesy (na Môizy). Izany fitenenana izany, izay vao noforonin'ny teolojiana kristiana tamin'ny taonjato faha-19 ka nanjaka nandritra ny fotoana lava ny fandalinana ara-tantara ilay lohahevitra, dia nisy naohitra tamin'ny fiandohan'ny taonjato faha-21. Voalohany dia mitaky ny hamoronana ny teny hoe "pagano-kristianisma" izany. Faharoa, mba hialana amin'ny hevitra manalasala dia tokony ny kristianisma ivelan'ny taona 135 no ampiharana io teny io, ka anondroana ireo vondrona tsy nanaraka ny ankamaroan'ny Kristiana toy ny Nazoreana sy ny Ebionita ary ny Elkasaita, ohatra.

Tantaran'ny jodeo-kristianisma[hanova | hanova ny fango]

Ny jodeo-kristianisma tamin'ny Andro Taloha[hanova | hanova ny fango]

Ny Nazôreana[hanova | hanova ny fango]

Ny Nazoreana dia vondrona ara-pivavanana jiosy mesianika izay fanta-pisiana tamin'ny taonjato voalohany, izay manaiky an'i Jesosy ho Mesia nefa manaja ny lalàm-pivavahan'ny Jiosy ka tsy mino ny maha Andriamanitra azy. Niantsoana antoko na sekta jodeo-kristiana niaina tamin'ny taonjato faha-4 izay nitandrina ny Lalàn'i Mosesy sy nino ny maha Andriamanitra an'i Jesosy ny anarana hoe Nazareana na Nazoreana.

Ny Ebiônita[hanova | hanova ny fango]

Ny Ebionita dia ireo Jiosy kristiana tamin'ireo taonjato voalohandohany nisian'ny kristianisma izay mino ny maha Mesia an'i Jesosy nefa manda ny maha Andriamanitra sy ny fiteraham-birijiny azy sady manamafy ny tokony hitandremana ny Lalàn'i Mosesy sy ny fombam-pivavahana jiosy. Tsy mampitovy ny Ebionita amin'ny atao hoe Kristiana Jiosy (na Jodeo-kristiana) ny mpikaroka sasany, sahala amin'ny Nazareana. Ny mpikaroka hafa anefa, toy ny nataon'ny Rain'ny Fiangonana, dia milaza fa vondron'olona iray ihany ny Ebionita sy ny Nazareana.

Ny Elkasaita[hanova | hanova ny fango]

Ny Elkasaita dia ireo tao amin'ny fikambanana ara-pivavahana jodeo-kristiana batista sinkretika manam-pirehana gnostika izay sady isan'ny jodaisma amin'ny ankapobeny amin'ny lafiny sasany, no isan'ny jodaisma nazoreana.

Ny jodeo-kristianisma tamin'ny Andro Antenatenany[hanova | hanova ny fango]

Tamin'ny Andro Antenatenany dia nenti-nanondro ireo Jiosy kristiana (katôlika) tao amin'ny Saikanosy Iberika (Pôrtogaly, Espaina) sy tany Amerika Latina, izay nanaraka miafina ny fivavahana jiosy, izany hoe nitandrina ny lalàn'i Mosesy na lalàn'i Môizy (toy ny famorana, ny fifadiana karazan-tsakafo sasany, sns) na niverina nanaraka ny fivavahana jiosy.

Ny jodeo-kristianisma ankehitriny[hanova | hanova ny fango]

Ny jodeo-kristianisma amin'izao fotoana izao dia antsoina hoe jodaisma mesianika, izay teraka tamin'ny taonjato faha-20 tao amin'ny tontolo pentekôtista tany Etazonia. Izany dia fihetsiketsehan'ny kristianisma evanjelika izay mampifanindran-dalana ny teolojia kristiana sy ny fombam-pivavahana jiosy sasany: ekeny ny maha Mesia sy ny maha Andriamanitra an'i Jesosy (Yeshua). Ny tena fantatra indrindra amin'ny Jiosy mesianika, na dia tsy ny maro an'isa indrindra aza, dia ireo "Jiosy ho an'i Jesosy" naorin'ny pastora iray manam-piaviana jiosy (izay lasa kristiana) tamin'ireo taona 1970. Isan'ny tanjon'ilay vondrona ny hampianatra ny Kristiana evanjelika momba ny fiaviana jiosin'ny finoany, sy ny hiovan'ny Jiosy finoana ho amin'ny kristianisma. Tsy eken'ny Jiosy manaraka ny jodaisma mahazatra anefa ny jodaisma mesianika.

Jereo koa[hanova | hanova ny fango]