Hitita

Avy amin'i Wikipedia
Sauter à la navigation Sauter à la recherche

Ny Hitita dia vahoaka nonina tao Anatolia tamin'ny taonarivo faha-2 tal. J.K. Ny anaran'ny faritra nanorenan'izy ireo ny fanjakany no niavian'ny anaran'ity vahoaka ity, dia i Haty (Hatti) izay niorina tao Anatolia afovoany manodidina ny renivohiny, dia i Hatosana (Hattusan). Nanomboka tamin'ny tenantenan'ny taonjato faha-17 tal. J.K. dia nanangana ny fanjakana isan'ireo matanjaka indrindra tao Atsinanana Afovoany ny mpanjakan'i Haty, izay nanjaka tamin'i Anatolia hatramin'ny manodidina ny taona 1200 tal.J.K. Tamin'ny taonjato faha-14 tal J.K. dia afaka nanapaka ny ampahany be tamin'i Siria ny Hitita, ka nahatonga azy hifanandrina amin'ireo fanjakana matanjaka hafa Atsinanana Afovoany izany, toa an'i Egipta sy i Mitany ary i Asiria.

Ny tantara sy ny sivilizasionan'ny Hitita dia naverin'ireo mpikaroka naseho nanomboka tamin'ny faran'ny taonjato faha-19 vokatr'ireo fisavana ny toeram-panorenana milevina tao Anatolia, ka isan'izany i Boğazköy izay ahitana ny sisam-paharavàn'i Hatosa; hita tao ny tanimanga fanoratana anarivony maro misy soratra miendri-pantsika ahitana ny endrika isankarazan'ny fiainana ara-politika sy ara-pivavahana ary ara-toekaren'ny Fanjakana hitita. ireo loharanon-tahirin-kevitra ireo dia nofenoin'ny fisavana ny toeram-panorenana milevina sy ny vavao entin'ny fahafantarana ny amin'ireo fanjakana hafa nifampikasoka tamin'ny Hitita toa an'i Egipta sy i Asiria, i Ogarita (Ugarit) ary i Emara (Emar).