Joany Hirkano II

Avy amin'i Wikipedia
(tonga teto avy amin'ny Hirkano II)

I Joany Hirkano II dia mpanjakan' i Jodea (na Jodia) tamin' ny taona 67 tal. J.K. hatramin' ny taona 63 tal. J.K., zanaka lahin' i Salôme Aleksandra sy Aleksandro Janeo. Tamin' ny taona 76 tal. J.K. i Joany Hirkano II dia notendren-dreniny ho mpisoronabe sy andrianan' i Jodea (na Jodia). Lasa mpanjaka izy tamin' ny fahafatesan-dreniny. I Aristôbolo II anefa naka an-keriny ny fitondrana ka nanery an' i Hirkano II hanaiky ny fifanarahana izay nametraka an' i Aristôbolo II hitana ny fahefana ara-pôlitika fa i Hirkano II kosa ny fahefana ara-pivavahana.

Tamin' izany fotoana izany dia nanampy an' i Hirkano II hiverina indray eo amin' ny maha mpanjaka azy i Antipatrôsy Idomeana (na Antipatera Idomeana), izay mponin' i Jerosalema notoavin-teny sy be hambom-po. Nikononkonona fikomiana hanonganana an' i Aristôbolo II mba hamerena an' i Joany Hirkano II i Antipatrôsy ka niteraka ady an-trano tao Jodea izany tamin' ny taona 67 tal. J.K. hatramin' ny taona 63 tal. J.K.

Tamin' ny taona 63 tal. J.K. dia nandray anjara tamin' ny ady hakana an' i Jerosalema i Pômpeio, mpitari-tafika rômana, ka nahatonga an' i Aristôbolo II sy ny fianakaviany akaiky ary ny Jiosy hafa maro koa hisesy tany any Rôma. Naverina amin' ny maha mpanjaka sy mpisoronabe azy indray i Joany Hirkano II. Nahenan' i Pômpeio ny tanin' ny Jiosy tao Palestina. Taorian' ny fahafatesan' i Pômpeio (taona 48 tal. J.K.) dia nanohana an' i Jolio Kaisara i Joany Hirkano II sy Antipatrôsy ka ho takalon' izany dia natao governora rômanan' i Jodea (prôkoratôra) i Antipatrôsy. I Hirkano II kosa natao mpisoronabe sy nomena ampaham-pahefana ara-pôlitika. Naverina amin' ny Jiosy indray ireo tany nesorin' i Pômpeio taminy sady nesorina avy ao Jodea ny miaramila rômana.

Nisy namono i Jolio Kaisara tamin' ny taona 44 tal. J.K. ary i Antipatrôsy koa tamin' ny taona 43 tal. J.K. Tamin' ny taona 40 tal. J.K. dia nisambotra an' i Joany Hirkano II tamin' ny alalan' ny tafiky ny Parta i Antigônôsy II zanak' i Aristôbolo II. Nanandratra ny tenany ho mpanjakan' i Jodea i Antigônôsy II nefa tamin' ny taona 39 tal. J.K. ny Loholona rômana dia nametraka an' i Herôda I Lehibe ho mpanjakan' i Jodea. Nalefa tany Jodea i Herôda nitondra tafika rômana ka nisambotra an' i Antigônôsy II tamin' ny taona 37 tal. J.K. sy namono azy avy eo.

Naverina hody any Jerosalema i Joany Hirkano II izay efa antidahy. Nandray anjara tamin' ny tetika hamonoana an' i Herôda anefa i Hirkano II ka novonoina tamin' ny taona 30 tal. J.K.

Jereo koa[hanova | hanova ny fango]

Hita tao amin'ny "https://mg.wikipedia.org/w/index.php?title=Joany_Hirkano_II&oldid=1056086"