Hazon' aina (araka ny Baiboly)
Ao amin' ny jodaisma sy ny kristianisma, ny hazon' aina (hebreo: עֵץ הַחַיִּים / ‘ēṣ haḥayyīm; latinina: lignum vitae) dia voalaza voalohany ao amin' ny toko faha-2, andininy faha-9 amin' ny Bokin' ny Genesisy ho "eo afovoan' ny saha Edena" miaraka amin' ny hazo fahalalana ny tsara sy ny ratsy (עֵץ הַדַּעַת טוֹב וָרָע ; Linum scientiae boni et mali). Taorian' ny fahalavoan' ny olombelona, "fandrao haninjitra ny tanany izy ka hakany koa ny hazon' aina, dia hohaniny, ka ho velona mandrakizay izy", dia napetraka teo amin' ny farany atsinanan' ny saha ny kerobima sy ny sabatra mirehitra mba hiambina ny lalana mankany amin' ny hazon' aina. Iadian-kevitra raha io hazon' aina io ihany na tsia no hazon' ny fahalalana ny tsara sy ny ratsy.
Ao amin' ny Baiboly, ivelan' ny Genesisy, ny teny hoe "hazon' aina" dia hita ao amin' ny Bokin' ny Ohabolana (3:18; 11:30; 13:12; 15:4) sy ny Apôkalipsy (2:7; 22:2, 14, 19). Hita ao amin' ny Boky fahefatr' i Esdrasa (2:12; 8:52) sy 4 Makabeo (18:16) koa izy io, izay anisan' ny apôkrifa jiosy.
Araka ny Apôkalipsy grikan' i Mosesy dia antsoina koa hoe Hazon' ny Famindrampo ny hazon' aina. Nino i Adama fa ny menaka avy amin' ny hazon' aina dia hanala azy amin' ny aretiny ary nandefa an' i Seta sy Eva ho eo am-bavahadin' ny saha mba hangataka diloilo avy amin' ny hazon' aina.