Fokom-pirenen' i Simeôna
Ny fokom-pirenen' i Simeôna dia iray amin' ny fokom-pirenena roa ambin' ny folon' i Israely. Tao amin' ny tapany atsimo-andrefan' i Kanaana no nisy azy, ao atsinanany ny fokom-pirenen' i Jodà, nefa mety voahodidin' ny tanin' i Jodà tao ndrefana. Anisan' ny fokom-pirenen' i Israely folo lazaina fa very ny fokom-pirenen' i Simeôna.
I Simeôna[hanova | hanova ny fango]
I Simeôna (hebreo: שִׁמְעוֹן / Shim'ôn na Shime‘ôn) dia zanaka faharoan' i Jakôba amin' ny zanakalahiny roa ambin' ny folo izay zanany tamin' i Lea. I Simeôna sy i Levy dia namaly faty ny anabaviny (i Dina) novetavetain' ny zanaky ny mpanjaka tao Sikema. Izy koa ilay notazomin' i Jôsefa tany Egipta tsy navela handeha mandra-pahatongan' i Benjamina avy any amin' i Jakôba rainy. Ireto ny zanak' i Simeôna: Jemoela, Jamina, Ohada, Jakina, Zohara (izay atao hoe Zera koa) ary i Saoly.
Ny tanin' ny fokon' i Simeôna[hanova | hanova ny fango]
Araka ny Bokin' ny Mpitsara dia tao anatin' ny faritry ny tanin' ny fokom-pirenen' i Jodà ny tanin' ny fokom-pirenen' i Simeôna. Araka ny fitantaran' ny Baiboly dia tonga tao amin' ny tany Kanaana ny fokom-pirenen' i Simeôna taorian' ny fialàna avy any Ejipta. Manome antsipiriany momba ny tantarany hatramin' ny Genesisy ka hatramin' ny fahababoana tany Babilôna ny Baiboly, avy eo dia tsy fantatra intsony ny tohin' ny tantaran' ny fokom-pirenen' i Simeôna ao amin' ny Baiboly.
Araka ny Baiboly ihany dia tao amin' ny tapany atsimo-andrefan' i Kanaana no nisy ny fokom-pirenen' i Simeôna, ka ao atsinanany ny fokom-pirenen' i Jodà, nefa mety voahodidin' ny tanin' i Jodà tao andrefana izy (Jôs. 19.1-9). Anisan' ny fokom-pirenen' i Israely tsy dia manan-danja loatra tao amin' ny Fanjakan' i Jodà ny fokom-pirenen' i Simeôna.
Araka ny voalazan' ny boky roa ao amin' ny Baiboly, dia ny Bokin' i Jôsoa (na Jôsoe) sy ny Boky voalohan' ny Tantara, dia misy tanàna voalaza fa miorina ao amin' ny tanin' i Simeôna (Jôs. 19.2-9; 1Tant. 4.28-32), nefa voalaza koa ireo tanàna ireo fa ao amin' ny tanin' i Jodà (Jôs. 15.20-30)[1].
Tsy nisaina ho foko?[hanova | hanova ny fango]
Tsy voaresaka ao amin' ny Hiran' i Debôra, izay heverina fa lahatsoratra tranainy indrindra ao amin' ny Baiboly[2] [3], ny fokom-pirenen' i Simeôna, ary ny Jewish Encyclopedia (1906) dia manambara fa ny fokom-pirenen' i Simeôna dia mety tsy nisaina ho fokom-pirenena[4]. Ao amin' ny Apôkalipsin' i Joany (Apô. 7.7) dia voatanisa miaraka amin' ny fokom-pirenena roa ambin' ny folon' i Israely hafa ny fokom-pirenen' i Simeôna.
Anisan' ny fokom-pirenen' i Israely nanjavona[hanova | hanova ny fango]
Anisan' ny fokom-pirenen' i Israely folo lazaina fa very ny fokom-pirenen' i Simeôna izay tsy niaraka tamin' ny fokom-pirenen' i Jodà sy ny fokom-pirenen' i Benjamina tao amin' ny Fanjakan' i Jodà fa nitambatra tamin' ny Fanjakan' i Israely avaratra izay noravan' ny Asiriana talohan' ny nandravan' ny Babilôniana ny Fanjakan' i Jodà.
Jereo koa[hanova | hanova ny fango]
- Fokom-pirenen' i Israely: Robena - Simeôna - Levy - Jodà - Isakara - Zabolôna - Dana - Naftaly - Gada - Asera - Jôsefa (Manase sy Efraima) - Benjamina.
- Fanjakan' i Jodà
- Fanjakan' i Israely (Samaria)
- Fanjakan' i Israely (mitambatra)
Loharano sy fanamarihana[hanova | hanova ny fango]
- ↑ Na'aman, Nadav. "The Inheritance of the Sons of Simeon." Zeitschrift Des Deutschen Palästina-Vereins (1953-), vol. 96, no. 2, 1980, pp. 143. JSTOR, www.jstor.org/stable/27931137.
- ↑ David Noel Freedman (1980). Pottery, Poetry, and Prophecy: Studies in Early Hebrew Poetry. Eisenbrauns. p. 131. ISBN 978-0-931464-04-1.
- ↑ Wong, Gregory T.K. "Song of Deborah as Polemic." Biblica, vol. 88, no. 1, 2007, pp. 1–22. JSTOR, www.jstor.org/stable/42614746.
- ↑ Isidore Singer et al., eds. (1901–1906). "Simeon, Tribe of". Jewish Encyclopedia. New York: Funk & Wagnalls Company.