Epistilin'i Jeremia

Avy amin'i Wikipedia
Sauter à la navigation Sauter à la recherche

Ny Epistilin'i Jeremia na Epistolan'i Jeremia na Taratasin'i Jeremia dia boky misy ny taratasy lazaina fa nosoratan'ny mpaminany Jeremia sy nalefany tany amin'ireo Jiosy babo izay hataon'ny mpanjaka Nebokadnetsara sesitany any Babilona, mba hanambara amin'izy ireo ny zavatra tian'Andriamanitra holazaina amin'izy ireo. Tsy hita ao amin'ny kanonan'ny Baiboly hebreo (na Tanakh) io boky io. Hita ao amin'ny dikan-tenin'ny Testamenta Taloha amin'ny teny grika atao hoe Septoaginta (na Septanta) sy ny Baiboly ortodoksa izy nefa tsy mifangaro amin'ireo boky kanonika fa mitokana. Toko faha-6 ao amin'ny Bokin'i Baroka izy ao amin'ny dikan-tenin'ny Baiboly amin'ny teny latina atao hoe Volgata izay isan'ireo boky deoterokanonika ao amin'ny Baiboly katolika.

Ity taratasy ity dia fikizahana ny sampy sy ny fanompoan-tsampy. Ny boky dia nosoratana mba hanoro lalana ny Jiosy tsy hivavaka amin'ny andriamanitry ny Babiloniana, fa hanompo an'Andriamanitra. Mampiomana ireo Hebreo any an-tsesitany ny mpanoratra fa ho babo mandritra ny taranaka fito mifandimby izy ireo, ary mandritra izany fotoana izany dia hahita fanompoan-tsampy izy ireo. Tsy tokony hivavaka amin'ny sampy ny Hebreo fa zavatra nataon'olona izany ka tsy afaka miteny na mandre na miaro tena.

Jereo koa:[hanova | hanova ny fango]