Datura stramonium

Ny Datura stramonium dia karazana zavamaniry mamony ao amin' ny fianakaviana Solanaceae. Mampahatsiahy ny endriky ny voniny na ny poizina ao amin' ilay zavamaniry ny anarany amin' ny fiteny maro. Ny fitelemana azy dia mahatonga fahitana zavatra tsy misy, fihetsika tsy mahazatra, fisavoritahana ara-tsaina, fahaverezan' ny fitadidiana ary fibedibedy, izay indraindray mitarika ho amin' ny tsy fahatsiarovan-tena mitohy ary avy eo ny fijanonan' ny fo sy ny fijanonan' ny taovam-pisefoana. Ity zavamaniry ity dia hita any amin’ ny tany nilaozana, eny an-tsaha, eny amoron-dalana ary indraindray eny amin’ ny zaridainam-panjakana aza.

Fanoritsoritana

Ankapobeny

Zavamaniry isan-taona ny Datura stramonium, mahatratra 30 sm hatramin’ ny 2 m ny haavony, misy fofona maimbo.

Ny raviny

Ny raviny dia somary lehibe, hatramin' ny 20 sm, miendrika lohan-tsotro, manana nifinify maranitra ary tsy mifandanja havia sy havanana ny fotony.

Ny voniny

Ny voniny, mitokana, amin' ny ankapobeny fotsy na mavo, 7 hatramin'ny 12 sm ny halavany miaraka amin' ny vondrom-pelambony mitambatra ho fantsona misokatra toy ny trompetra misy felany dimy misy tsy tena misongadina, ary ny vondron-dravimbony dia mamorona fantsona dimy zoro misy maitso hatsatra, fohy kokoa noho ny vondrom-pelambony. Ny zana-karazany iray dia misy voniny volomparasy.

Ny voany

Ny voany miendrika atody, izay masaka amin' ny Jolay ka hatramin' ny Oktobra, dia mitsangana, rakotra tsilo lava sy mafy nefa mety tsy misy azy ireo ihany koa (Datura stramonium var. inermis sy Datura stramonium var tatula). Izy io dia misy hodiny mafy izay misokatra rehefa matoy ka mizara efatra mampiseho ny vihy ao anatiny. Ny vihy miendrika voan-kena, mirefy 3 hatramin' ny 4 mm ny halavany, dia mainty ary misy tsimoka miolikolika ny ao anariny.

Zana-karazana sy endrika

Araka ny voalazan' ny Tropicos (18 Aogositra 2015) (Fampitandremana: lisitra mety misy teny mitovy hevitra):

Datura stramonium var. canescens Roxb.
Datura stramonium var. chalybaea W.D.J. Koch
Datura stramonium var. godronii Danert
Datura stramonium var. inermis (Juss. ex Jacq.) C.E. Lundstr.
Datura stramonium var. stramonium
Datura stramonium var. tatula (L.) Torr. [1824]

Fisiany eto Madagasikata

Anarany amin' ny teny malagasy

Ny anaran' ny Datura stramonium (Datura tatula) amin' ny teny malagasy dia itambarany amin' ny karazana Datura hafa. Indreto ireo anarana ireo: kirary, ramiarana, voandramiary^[1]^[2]. Karazana nampidirina izy io^[2].

Toerana aniriany

Karazan-javamaniry mahazatra eto Madagasikara ny Datura stramonium, izay heverina ho ahidratsy amin' ny voly na any an-tany foana^[3]^[4]. Fahita any amin' ny toeram-pambolena any afovoan-tanin' i Madagasikara izy io.

Fampiasana azy

Eto Madagasikara sy ao Afrika Trôpikaly dia ampiasaina amin' ny fitsaboana ny sohika, ny kohaka, ny raboka ary ny sita ny Datura. Fohina toy ny sigara ny raviny sy ny voniny maina. Ity zavamaniry ity koa dia ampiasaina amin' ny fampitoniana ny olona manana aretin-tsaina.

Jereo koa

Loharano sy fanamarihana

↑ "Datura stramonium L.", Projet Pl@ntNet
1 2 "Datura stramonium (jimsonweed)", CABI Compendium
↑ "Datura stramonium L.", portal.wiktrop.org
↑ "Datura stramonium (DATST)", EPPO Global Database

[1] "Datura stramonium L.", Projet Pl@ntNet

[:0-2] 1 2 "Datura stramonium (jimsonweed)", CABI Compendium

[3] "Datura stramonium L.", portal.wiktrop.org

[4] "Datura stramonium (DATST)", EPPO Global Database

[1]

[2]

[3]

[4]