Cynanchum junciforme
Ny Cynanchum junciforme dia karazana zavamaniry mamony ao amin' ny fianakaviana Apocynaceae (Asclepiadaceae teo aloha) izay tsy hita raha tsy eto eto Madagasikara. Navoaka voalohany am-boky tamin' ny anarana hoe Pycnoneurum junciforme izy io tamin' ny taona 1838. Amin' ny teny malagasy ity zavamaniry ity dia atao hoe belahazotany, foko, fokotohatra, fokotohatse, kidorika, kifofo, kifofoka, kifoka, kifoko, kimaogaga, ary kitsanga. Ny anarany ara-tsiansa feno dia Cynanchum junciforme (Decne.) Liede (na Pycnoneurum junciforme Decne. teo aloha).
Famariparitana
[hanova | hanova ny fango]Vatana sy taho
[hanova | hanova ny fango]Zavamaniry maharitra mihoatra ny roa taona, mitsangana, ary mampahatsiahy ny harefo ny Cynanchum junciforme. Miendrika varingarina, maitso, ary misy tsipitsipika madinika, misy nofony malemy na somary misy nofon-kazo ny tahony, izay amin' ny ankapobeny, tsotra na vitsy rantsana.
Ravina
[hanova | hanova ny fango]Kely dia kely ny ravin' ny Cynanchum junciforme, indraindray saika tsy misy na mihintsana aloha loatra, ka manome endrika saika tsy misy ravina an' ilay zavamaniry. Mifanohitra sy manify izy ireo ary mitovitovy amin' ny kirana kely indraindray.
Vony
[hanova | hanova ny fango]Mamorona vondrom-bony kely ny vonin' ny Cynanchum junciforme eo amin' ny tendron-taho na eo ambanin' ny taho. Kely izy ireo ary mampiseho ny hasaro-drafitra mampiavaka ny karazana tranainy ao amin' ny Asclepiadaceae. Misy ravimbony dimy, matetika somary voloina ny vondron-dravimbony, fa ny vondrom-pelambony izay misy felany dimy mitambatra eo am-potony, dia miovaova avy amin' ny fotsy manopy mavo ka hatramin' ny maitso na volontany. Fitambaran' ny lahimbony sy ny fandray vovobony ny ampahany afovoany amin' ny voniny, ary manana endrika manokana izay nanavahana ny Cynanchum amin' ny Pycnoneurum teo aloha ny ny fehibory. (Marihina fa zavatra iray ihany ny tondroina amin' ireo teny roa ireo ankehitriny).
Voa
[hanova | hanova ny fango]Kitapo lavalava miendrika ampela fanenomana ny voan' ny Cynanchum junciforme, izay malama na somary misy kirany mitsoriadriaka, matetika miforona tsiroaroa, nefa ny iray monja no mety hahatratra ny fahamatoiny. Ahitana volovolo malandilandy toa lasoà amin' ny tendrony iray ny vihim-boa tsirairay, izay manamora ny fanaparitahan' ny rivotra azy ireo.
Ekôlôjia
[hanova | hanova ny fango]Hita indrindra any amin' ny faritry ny hivoka be ahitra sy amin' ny faritra be kirihitra iva sy mihizina any amin' ny faritra avo afovoany sy any atsimo eto Madagasikara ny Cynanchum junciforme. Mahatanty tsara ny doro tanety miverimberina izy io noho ny fakany sy ny fotony ambanin' ny tany mahatohitra izany. Maniry any anaty sahalava sy eny an-tampon-kavoana tsy misy ala izay matetika andehanan' ny goaika izy io.
Fampiasana
[hanova | hanova ny fango]Eto Madagasikara dia ny vodin' ny Cynanchum junciforme azo hanina ao aminy no tena tadiavina indrinda taloha, eny fa na ankehitriny, indrindra amin' ny fotoan' ny kere, na hanin' ny ankizy miandry omby. Mila fitadremna ny fihinanana azy satria mety hahafaty. Ampiasaina mba hanomanana tambavy mangidy mitovy amin' ny fampiasana ny saladingita (Cichorium endivia) na ny herokeroka (Cichorium intybus) koa io vodiny io.
Jereo koa
[hanova | hanova ny fango]Karazana mitovy anarana malagasy amin' ny Cynanchum junciforme:
- foko na kimaogaga: Eriosema procumbens (avokombiby, foko, kimaogaga na kofolona)
- kifofoka: Cynanchum sessiliflorum (kifofoka)
- kifoka: Vigna angivensis (avoko, fokotsaramaso, kifoka, kimaotsa)
- kitsanga: Pycnostachys coerulea (kitsanga, mangavony, ramangavony, tsitondratondrana)