Cannabis sativa
Ny Cannabis sativa dia karazana zavamaniry mamony, ao amin' ny fianakaviana Cannabaceae. Zavamaniry ahitra maniry isan-taona izy io. Ity zavamaniry ity dia avy amin' ny faritra ekoatôrialy sy trôpikaly ary miavaka noho ny fahery mitombony. Ny famakafakana fototarazo natao tamin' ny taona 2018 dia ahafahana manavaka zana-karazana telo:
- ny Cannabis sativa subsp. sativa izay ampiasaina amin' ny indostrialy;
- ny Cannabis sativa subsp. indica izay fantatra amin' ny fiantraikany amin' ny saina, ary
- ny Cannabis sativa subsp. ruderalis.
Anisan' ny zavamaniry tranainy indrindra novolena izy io. Nahazo alalana indray ny fitrandrahana azy amin' ny fambolena any amin' ny firenena maro, rehefa ambany dia ambany ny tetrahidrôkanabinôla (THC). Ity zavamaniry ity dia fantatra amin' ny fampiasana azy amin' ny fitsaboana, indrindra ny fisian' ny kanabidiôla (CBD) betsaka. Amin' ny fepetra sasany, ny fivarotana ny vokatra azo avy aminy dia nahazo alalana ho an' ny fahasalamana.
Ny rongony dia nampiasaina tamin' ny sehatra isan-karazany, manomboka amin' ny tambavy sy zava-manitra amin' ny sakafo magrebina ka hatramin' ny fampiharana maro: fanamboarana lamba, fanorenana, kôsmetika, faneferam-peo sy faneferan-kafanana, menaka, tady, lafi-pandriana, fandrehitra, taratasy, sakafon' olombelona, sakafom-biby, fandoro, akora ambatra amin' ny plastika, sns.
Izao ny anarany amin' ny teny malagasy: ahibola, ahimanga, ahitsandriana, jea, jia, jiajia, mahogo, rongonilahy, rongony, soroma[1].