Apolinarisma

Avy amin'i Wikipedia
Sauter à la navigation Sauter à la recherche

Ny apolinarisma dia fampianarana mikasika an'i Jesosy Kristy izay ilazana fa tsy manana fanahin'olombelona i Jesosy fa fanahin'Andriamanitra, dia ilay Teny izay niditra tao amin'ny vatan'olombelona nisolo ny fanahy maha-olombelona. Ny vatan'i Kristy dia vatana ara-panahy sady nomem-boninahitra, ary tsy manana natiora roa ao amina persona tokana i Jesosy. I Apolinario, eveka tany Laodikea ao Siria, no nanolotra izany fampianarana izany.

Fiforonan-teny[hanova | hanova ny fango]

Ny teny hoe apolinarisma dia fanagasiana teny avy amin'ny anaran'ny tompon'ny fampianarana, dia i Apolinario (latina: Apollinaris; grika: Άπολλινάριος / Apollinarios).

Ny fampianaran'i Apolinario[hanova | hanova ny fango]

Ny Fiangonana ofisialy dia mampianatra fa manana natiora roa i Kristy ka ny voalohany natioran'Andriamanitra fa ny faharoa natioran'olombelona ao amin'ny persona tokana. Ny apolinarisma kosa mandà ny fisian'ny fanahin'olombelona ao amin'i Kristy sady mihevitra an'i Kristy ho ilay hany Teny tonga nofo ao amin'ny vatan'olombelona. Azo fintinina amin'izao ny fampianaran'ny apolinarisma: "Tokana ny natior'Andriamanitra Teny tonga nofo" (grika: μία φύσις τοῦ θεοῦ λόγου σεσαρκωμένη / mía phúsis toû theoû lógou sesarkōménē). Izany rehetra izany no fomba hitan'i Apolinario hanoherany ny arianisma izay tsy manao an'i Jesosy ho Andriamanitra.

Fanamelohana ny apolinarisma[hanova | hanova ny fango]

Nohelohin'ny sinoda telo natao tao Roma teo ambany fahefan'ny papa Damasio I ny fampianaran'i Apolinario, dia ny sinoda natao tamin'ny taona 374/376 izay nanameloka an'i Apolinario sy i Timoteo izay nilaza fa tsy manana fanahin'olombelona i Jesosy kristy, fa ny Tenin'Andriamanitra no manetsika azy; sy ny sinoda tamin'ny taona 377 izay nanameloka ireo Apolinarista sy Markelianista, izay sampan'ny Gnostika; ary ny sinoda tamin'ny taona 378 izay nanamafy ny fanamelohana an'i Ario[1], i Sabelio[2], i Eonomio[3] ary i Fotino[4]. Tamin'ny taona 381 dia nohamafisina ny tao amin'ny konsilin'i Konstantinopoly ny fanamelohana ny apolinarisma.

Jereo koa:[hanova | hanova ny fango]

Fanamarihana sy rohy[hanova | hanova ny fango]

  1. Nilaza i Ario na Ariosy fa ny Ray ihany no Andriamanitra fa tsy ny Zanaka na ny Fanahy Masina. (Jereo: Arianisma)
  2. Nampianatatra i Sabelio fa ny Ray sy ny Zanaka ary ny Fanahy masina dia fomba fiseho telon'ilay Andriamanitra tokana fa tsy persona telon'Andriamanitra. (Jereo: Sabelianisma)
  3. Nampianatra i Eonomio fa tsy misy fotoviam-pomba (natiora) eo amin'ny Ray sy ny Zanaka.
  4. Mandà ny fahatongavan'i Kristy i Fotino.