Angovo simika
Ny angovo simika dia ny angovo avoakan' ny akora simika mandritra ny fiota simika mba hiova ho zavatra hafa. Ny fandoro (fôsily na tsia), ny sakafo sy ny bateria dia ohatra amin' ny zavatra mitahiry angovo simika. Misy fandraisan' ny angovo anjara, izay trohin' ny rafitra simika na avoakany (amin' ny endrika hafanana na angovo araka aratra, ohatra), ny fanapahana na ny fiforonan' ny fatorana simika. Ny angovo simika no tena fomba fitahirizana angovo ao amin' ny biby mampinono, io akora io dia miova ho angovo mekanika ao anatin' ny nofotra. Anisan' ny endrika fantatra amin' ny fitahirizana angovo araka aratra koa ny angovo simika, indrindra ao amin' ny bateria.
Endrika angovo mety mifandraika amin' ny fandaharana ara-drafitry ny atôma na ny môlekiola ny angovon-toerana simika. Mety ho vokatry ny fatorana simika ao anatin' ny môlekiola na ny fifanakalozan' asa eo amin' izy ireo io fandaharana io. Azo ovaina ho endrika angovo hafa ny angovo simikan' ny akora simika, amin' ny alalan' ny fiota simika. Ohatra, rehefa may ny fandoro dia miova ho hafanana ny angovo simikan' ny ôksizenina môlekiolary sy ny an' ilay fandoro. Manova ny angovon' ny masoandro ho angovo simika (ôksizenina voalohany indrindra) amin' ny alalan' ny dingan' ny fôtôsentezy ny zavamaniry, ary ny angovo araka aratra dia azo ovaina ho angovo simika, na ny mifamadika amin' izany, amin' ny alalan' ny fiota elektrôsimika.