Alkalôida
Ny alkalôida dia akora voajanahary avy amin' ny zavamananaina, môlekiola misy atôma azôta iray farafahakeliny (matetika ao anaty tsingerina), amin' ny ankapobeny manana toetra alkalinina, ary misy fiantraikany ara-batana amin' ny olona na amin' ny biby, na dia amin' ny fatra kely aza. Noho ny fandrosoan' ny indostrian' ny fanamboaram-panafody dia nanokatra ny sehatry ny "fanafody simika" izy ireo tamin' ny faran' ny taonjato faha-19. Efa ela ny alkalôida no matetika voasokajy sy nomena anarana araka ny zavamaniry na holatra na biby nahazoana azy.
Ohatra amin' ny alkalôida mitondra anarana avy amin' ny zavamaniry:
- atrôpinina, avy amin' ny hoe Atropa belladonna
- kôkainina, avy amin' ny hoe Erythroxylum coca (kôka)
- nikôtinina, avy amin' ny hoe Nicotiana tabacum (paraky)
- berberinina, avy amin' ny hoe Berberis vulgaris
- sôlaninina, avy amin' ny hoe Solanum (oh. ovimbazaha, voatabia, sns)
- teôbrôminina, avy amin' ny hoe Theobroma cacao (kakaô)
- strikninina, avy amin' ny hoe Strychnos nux-vomica
Ohatra amin' ny alkalôida mitondra anarana avy amin' ny holatra:
- psilôsinina, avy amin' ny hoe Psilocybe.
- psilôsibinina, avy amin' ny hoe Psilocybe, indrindra ny Psilocybe cubensis.
- penisilinina, avy amin' ny hoe Penicillium sy Aspergillus.
Ohatra amin' ny alkalôida mitondra anarana avy amin' ny biby:
- bofôtôksinina, avy amin' ny hoe Bufo (saobakaka);
- epibatidinina, avy amin' ny hoe Epipedobates tricolor (karazana sahona);
- serpentinina, avy amin' ny hoe Serpentes (bibilava);
- pomiliôtôksinina, avy amin' ny hoe Dendrobates pumilio na Oophaga pumilio (karazana sahona)
- kantaridinina, avy amin' ny hoe Lytta vesicatoria (karazana lalitra).
- kônôtôksinina, avy amin' ny hoe Conus (akoran-dranomasina).
- aplisiatôksinina, avy amin' ny hoe Aplysia (akoran-dranomasina).