Ahidrano maitso
Ny ahidrano maitso dia vondron' ahidrano izay ahitana indrindra ny famaitso a sy b. Ny ahidrano maitso dia miloko maitso amin' ny ankapobeny nefa mety haneho loko hafa toy ny mavkely sy volom-boasary ary mena koa. Be dia be izy ireo any amin' ny morontsirak' i Normandie. Vondrona eokariôta aotôtrôfa misy famaitso ny ahidrano maitso, ahitana ny fisampanana Prasinodermophyta sy ny vondrona mpirahavavy aminy tsy manana anarana izay mahafaoka ny Chlorophyta sy Charophyta/Streptophyta. Nipoitra tao anatin' ny Charophyta ny zavamaniry an-tanety (Embryophyta) sady mpirahavavy amin' ny Zygnematophyceae.
Hatramin' ny nahafantarana fa nipoitra tao anatin' ny ahidrano maitso ny Embryophyta, dia nanomboka nampiditra azy ireo ny mpanoratra sasany. Mônôfiletika (iray razana) ny klada feno izay ahitana ny ahidrano maitso sy ny embriôfita ary antsoina hoe klada Viridiplantae sy ny fanjakana Plantae. Ny ahidrano maitso dia ahitana koa ny zavamananaina tokan-tsela manam-pilika (Flagellata) sy miaina anaty andia, ny ankamaroany dia manana pilika (rambo) roa isaky ny sela, ary koa ny endrika andia miara-miaina isan-karazany, miendrika goba sy misy sarikofehy, ary ny ahidrano maro sela.
Misy karazany 22 000 eo ho eo ny ahidrano maitso, ka ny ankamaroany dia miaina amin' ny maha sela tokana mandritra ny ampahany be amin' ny fiainany, nefa misy karazana hafa izay mamorona andia miara-miaina na sarikofehy lava na ahidranomasina lehibe misy fizarazarana.
Misy zavamananaina vitsivitsy hafa izay miantehitra amin' ny ahidrano maitso amin' ny fanaovana fôtôsentezy. Avy amin' ny ahidrano maitso natelin' izy ireo sy miaina ao anatin' izy ireo ny klôrôplasta ao amin' ny Dinoflagellate an' ny vondron-karazana Lepidodinium sy ao amin' ny Euglenida ary ao amin' ny Chlorarachniophyta, ary mitazona nokleômôrfa (vihin-tsela tsy miasa amin' ny maha vihy azy intsony). Ny ahidrano maitso koa dia hita ao anatin' ny Paramecium misy tsibolo, sy ao amin' ny Hydra viridissima ary ao amin' ny kankam-pisaka (Platyhelminthes).
.jpg)
Misy karazana ahidrano maitso sasany, indrindra ny sokajy Trebouxia (ao amin' ny kilasy Trebouxiophyceae) sy ny sokajy Trentepohlia (ao amin' ny kilasy Ulvophyceae), izay hita ao amin' ny holatra (Fungi) ka mamorona savoronala. Amin' ny ankapobeny dia tsy afaka miaina samirery ny karazana holatra izay miara-miombona antoka ao amin' ny savoronala, fa ny karazana ahidrano dia matetika hita miaina eny amin' ny natiora tsy miaraka amin' ny holatra.
Ny Trentepohlia dia ahidrano maitso miendrika sarikofehy izay afaka miaina amin' ny fomba tsy miankina eo amin' ny tany mando na vato na hodi-kazo, na mamorona fiaraha-miaina miantoka fôtôsentezy ao amin' ny savoronala ao amin' ny fianakaviana Graphidaceae. Ny ahidrano lehibe Prasiola calophylla (Trebouxiophyceae) dia miaina an-tanety, sahala amin' ny Prasiola crispa, izay miaina amin' ny faritra farany ambony takatry ny ranomasina, izay miaina an-tanety ary any Antarktika dia afaka mamorona lafika lehibe amin' ny tany mando, indrindra akaikin' ny andiam-borona.