Adama (araka ny silamo)
I Adama, ao amin' ny teôlôjia islamika, dia inoana fa olombelona voalohany teto an-tany ary mpaminany voalohany ao amin' ny finoana silamo. Amin' ny teny arabo izy dia atao hoe آدم / ʾĀdam. Tena hajain' ny Mozilmana ny andraikitr' i Adama amin' ny maha rain' ny zanak' olombelona azy. Miantso an' i Eva (arabo: حَوَّاء / Ḥawwāʾ) vadiny ho "renin' ny zanak' olombelona" koa ny Mozilmana. Mihevitra an' i Adama ho Mozilmana voalohany ny Mozilmana, araka ny voalazan' ny Kor'any fa nitory finoana mitovy ny mpaminany (arabo: نبي / nabī) rehetra, dia ny finoana silamo (arabo: إسلام / islām, izay midika ara-bakiteny hoe "fanekena an' Andriamanitra").
Araka ny finoana silamo dia noforonina avy amin' ny zavatry ny tany i Adama ary novelomin' Andriamanitra. Napetrak' Andriamanitra tao amin' ny saham-paradisa i Adama. Taorian' ny nanotany tamin' ny nihinanany ny voan' ilay hazo voarara (na Hazon' ny tsy fahafatesana) taorian' ny nandraran' Andriamanitra azy tsy hanao izany, dia nolavina ho azy ny paradisa ary nalefa honina teto an-tany izy. Manampy ny Qiṣaṣ al-Anbiyāʾ (arabo: قصص الأنبياء / Qiṣaṣ al-Anbiyāʾ: "Fitantaran' ny Mpaminany") fa nazera nifanalavitra i Adam sy i Eva, rehefa noroahina avy tao amin' ny paradisa, dia, ary nifankahita teo amin' ny Tendrombohitra Arafat tamin' ny farany. Tamin' i Adama no nahaizan' ny olombelona namboly, nijinja, nahandro amin' ny lafaoro ary nibebaka.
Raisina ara-bakiteny sy ara-panoharana ho momba ny fifandraisan' ny olombelona amin' Andriamanitra ny fitantarana an' i Adama ao amin' ny Kor'any. Tsy voatery manaraka ny "kreasiônisma Tany Tanora" ny finoana silamo, ary mino ny ankamaroan' ny Mozilmana fa efa nisy talohan' i Adama ny fiainana eto an-tany. Tsy aseho fotsiny amin' ny maha mpaminany na amin' ny maha olombelona azy i Adama, fa amin' ny maha môdely voalohan' ny olombelona tonga lafatra azy koa.