Acacia dealbata

Ny Acacia dealbata dia karazana zavamaniry mamony ao amin' ny fianakaviana Fabaceae. Tsy fahita raha sy any faritra atsimo-atsinanan' i Aostralia izy io saingy hita amin' ny maha karazana nampidirina na manafika azy any amin' ny faritra hafa. Amin' ny teny malagasy izy dia atao hoe akasià, halamborona na mimozà. Izy io dia hazo na hazobotry mivela-drantsana, manana hodiny malama sy ravina volondavenona manopy manga na volombolafotsy, kapitioly (vondrombony) boribory misy voniny mavo, ary pepany kely mahitsy somary miolika. Mihamitombo haingana io karazana io ary mifanaraka amin' ny karazana tany tsy mitahiry rano. Ambolena betsaka ho haatao haingo izy io noho ny voniny sy ny fofona manitra ananany, saingy lasa manafika manerana ny tany maro izy, anisan' izany i Madagasikara.

Famariparitana

Mahitsy fitsangana ny Acacia dealbata amin' ny ankapobeny, avy eo mivelatra mankany ivelany ny rantsany, sady manana tampony maivana ary indraindray mikorontana. Mety hahatratra 10 m eo ho eo ny haavony, na mihoatra lavitra noho izany aza any Aostralia. Matetika dia fohy ny vatany, fa ny hodiny, malama sy volondavenona amin' ny hazo tanora, dia mihamatroka sy mivakivaky rehefa mihantitra.

Ravina

Anisan' ny toetra ahafantarana azy ny ravin' ny Acacia dealbata. Toa volom-borona roa sosona ny raviny, mampahatsiahy ny ampanga sasany. Kely ny zana-pelana sady tery sy maro. Maitso manopy volondavenona ka hatramin' ny manga manopy volom-bolafotsy, izay matetika rakotra vovoka fotsy, ny lokony. Mijanona ho maitso lalandava ny raviny amin' ny ankapobeny any amin' ny faritra manana toetany malefaka.

Vony

Miseho betsaka mandritra ny ririnina na ny fiandohan' ny lohataona ny vonin' ny Acacia dealbata, arakaraka ny toetany. Mivondrona ao anaty vondrombony kely boribory mavo izy ireo. Misy vony kely maro ahitana lahimbony misongadina ny vondrombony tsirairay, ka manome azy ireo endrika malambolambo. Mamerovero sy manintona bibikely mpamidra vovobony ny voniny.

Voa

Ny voan' ny Acacia dealbata dia pepa mahitsy na somary miolika. Maitso manopy manga na volomparasy izy ireo amin' ny voalohany, avy eo miova ho volontakatra rehefa matoy. Mafy sy miendrika atody ary miloko volontany antitra ny vihim-boany. Sahala amin' ny karazana maro ao amn' ny Acacia, dia mamokatra vihim-boa be dia be izay afaka maniry indray na dia efa nijanona mandritra ny fotoana maharitra ao anaty tany aza ity karazana ity.

Tsinjara toerana

Nampidirina avy any Aostralia ny Acacia dealbata ary lasa maniry hoazy na da tsy ambolena intsony. Any Frantsa dia hita any amin' ny morontsirak' i Mediteranea sy Atlantika ilay zavamaniry izay efa maniry hoazy. Miroborobo amin' ny tany misy silisy izy io ary mahatanty mari-pana ambany (-7 °Chatramin' ny -10 °C). Mila tara-masoandro be anefa izy. Noho izany, ny faritra lehibe indrindra eto amin' izao tontolo izao ahitana ny A D dia ny atsimon' i Aostralia, ny faritra manodidina an' i Mediterane, i California, i Silỳ, ny atsimon' i Sina ary ny lembalemba any India, i Madagasikara ary ny faritra atsimo amin' i Afrika.

Fampiasana

Maro ny fampiasana ny Acacia dealbata.

Fehezam-boninkazo

Alaina hatao fehezam-boninkazo fanao haingon-trano ny vonin' ny Acacia dealbata ary matetika any Italia, any Albania, any Rosia ary any Jeôrjia dia tolorana voninkazo avvy amin' ny Acacia dealbata ny vehivavy amin' ny andro iraisam-pirenena ho an' ny vehivavy.

Ranomanitra

Ampiasaina amin' ny fanamboarana ranomanitra ny esansy avy amin' ny vonin' ny Acacia dealbata.

Nahandro

Ampiasaina indraindray amin' ny fikarakarana ny nahandro indiana atao hoe Caṭnī ny ravin' ny Acacia dealbata.

Taozavatra sns

Any Aostralia dia mampiasa ny hoditry ny Acacia dealbata ny vahoaka Ngunnawal ao amin' ny Australian Capital Territory (ACT) sy ny mponina Wiradjuri any New South Wales (NSW) mba hanaovana tady, ampiasainy koa ny ranon-kazo hanamboarana lakôly na ampifangaroina amin' ny lavenona mba hanamboarana kataplasma, ary ny nofon-kazony fitaovam-piasana ary ny vihim-boany hanaovana lafarinina.

Ilaina amin' ny fanamboarana fanaka sy ny asa an-trano anatiny ny hazon' ny Acacia dealbata, saingy voafetra ny fampiasana azy. Manana lokon-tantely izy io. Izy io dia manana lanja isam-bentin-kadiry antonony (540–720 kg/m³), ary mitovitovy amin' ny Acacia melanoxylon izay akaiky azy, fa somary mazava kokoa ny lokony ary tsy manana fo matroka.