Abrus precatorius
Ny Abrus precatorius dia karazan-javamaniry mamony ao amin' ny fianakaviana Fabaceae. Izy io dia hazobotry vahy avy amin' ny Tontolo Taloha. Zavamaniry mianika misy voany miloko mena sy mainty misy poizina izy io. Amin' ny teny malagasy dia kelimiefitra, masokoaky, masonamboangara, masonamboatora, masonombilahy, vahemboamena, vahimboamena, voamahatorana, voamaintilany, voamaintorana, voamantorana, voamasotrandraka, voamatorana, voamboanamainty, voamboanamena, voamena.
.gif)
Vahy mihanika ity zavamaniry ity, roa ravin-tsimoka, mahatratra 5 m miakatra ary 6 hatramin' ny 9 m ny halavany. Mamorona taho maro be izy io, izay misampina amin' ny hazo lehibe hanohana azy. Ny ravina mizarazara sy mifandimby, dia ahitana zana-pelana mandeha 8 ka hatramin' ny 17 tsiroaroa, salavalava na mibikan' atody. Mirefy 2 ka hatramin' ny 7 sm ny halavan' ny vondromboniny; ny vondrom-pelambony, izay mivelatra, dia miloko mavokely hatramin' ny volomparasy, indraindray fotsy. Ny voany dia matetika mifangaro sy miolikolika ho sampaho, misy vihim-boa 3 hatramin' ny 7 tena mafy, mavokely amin' ny voalohany dia mena ary misy teboka mainty.
Velona any amin' ny faritra trôpikaly ao amin' ny Tontolo Taloha (Afrika, Azia), any Aostralia ary any amin' ny nosin' i Pasifika ity zavamaniry ity. Niitatra hatrany amin' ny faritra trôpikaly ao amin' ny Tontolo Vaovao ny faritry ahitana azy ankehitriny, indrindra fa any Nouvelle-Calédonie, ao Mayotte, eto Madagasikara, ao Maorisy, ao La Réunion, any Hawaii, any Amerika Atsimo, any Sorinama, Florida ary koa any amin' ny faritra Antilia.