Ôrkesitra
Ny ôrkestra dia vondron-javamaneno ao amin' ny mozika klasika, izay manambatra zavamaneno avy amin' ny fianakavian-javamaneno samihafa. Amin' ny ankapobeny dia misy antokon-javamaneno efatra lehibe:
- ny zavamaneno misy tadiny, toy ny lokanga, ny viôla, lokangabe, ary lokanga beso;
- ny zavamaneno hazo tsofina, toy ny sodina, ny ôbôy, ny klarinety, ny basôna, ary ny saksôfônina koa indraindray;
- ny zavamaneno varahina tsofina, toy ny anjomara frantsay, ny trômpetra, ny trômbônina, ny kôrne, ary ny tiobà, ary indraindray eofôniôma;
- ny zavamaneno velezina, toy ny timbaly, ny amponga mazava feo, ny amponga beso, kipantsona, ny telozoro, ny ampongatapaka, ny tamotamo ary ny zavamaneno velezina maro singa.
Ny zavamaneno hafa toa ny pianô, ny klavesinina, ny ôrga, ary ny selestà dia mety hiseho indraindray amin' ny antoko fahadimin' ny zavamaneno misy vondron-kitendry, na mety hijoro irery ho zavamaneno sôlô, toy ny harpa sy, amin' ny fampisehoana ny feonkira môderina sasany, ny zavamaneno elektrônika ary ny gitara.
Miankina amin' ny mpamorona sy ny vanim-potoana ary ny sokajin' ny sanganasa hampanenoina ny isa sy ny fanakambanana ny mpilalao mozika. Matetika dia tarihin' ny lehiben' ôrkestra izy ireo. Arakaraka ny fianakavian-javamaneno mandrafitra azy (fianakavian-javamaneno misy tadiny sy fianakavian-javamaneno tsofina roa ary fianakavian-javamaneno velezina), ny ôrkesitra dia afaka maka endrika maro toy ny amin' ny mozika klasika, ny ôrkestra senfônika lehibe (fianakavian-javamaneno efatra mitambatra), ny ôrkesitra harmônia (ahitana ny fianakavian-javamaneno tsofina roa sy ny fianakavian-javamaneno velezina), ny fanfara (zavamaneno tsofina varahina, saksôfônina sy zavamaneno velezina) ary ny bagado (zavamaneno tsofina hazo sy zavamaneno velezina) ary ny ôrkesitran-javamaneno misy tadiny.