Androy

Avy amin'i Wikipedia
Hanketo: Fikarohana, karohy

Androy dia faritra any amin'ny faritan'i Toliara, faritan' Anosy any atsinanana sy ny onin'i Menarandra any andrefana ; Ambovombe-Androy no renivohiny, ary ny Antandroy, na "mponina ao amin'ny tanin'ny roy" (mimosa delicatula) no iantsoana ny mponina ao. Mitsitapitapy ny renirano any Androy. Arakaraka ny handrosoan'ny andro no tsy maintsy handavahana lalindalina kokoa ny vovo hahitana rano. Ny vovo lehibe ao aminy no maha-Ambovombe an'Ambovombe.

Na dia malaza amin'ny haintany sy ny tsy fisian-drano aza Androy, dia misy ihany ny fotoana hisian'ny orambaratra (Desambra-Aprily) sy ny erikerika amin'ny volana jolay. Ka izany fotoana izany no hararaotina hambolena ny balahazo (mangahazo) sy tsako (katsaka), izay tarihy ho an'ny andro maina.

Ankoatra ny roy dia ny fantsiholitra (alluaudia procera) sy ny raketa (opuntia dillenii sy opuntia ficus-indica) no tena maniry amin'io faritra io.

Ny fantsiholitra dia ampiasaina hananganana trano fonenana noho izy io tsy mora andairan'ny afo, satria ny faritra atsimo sy atsimo-andrefana dia hitrangan'ny doro-tanety matetika.

Ny raketa kosa dia mahavonjy tokoa amin'ny andro sarotra : ny voany hohanin'ny olona ary ny raviny kosa rehefa avy dorana ka miala tsilo dia sakafo ho an'ny biby.

Manana toerana manan-danja eo amin'ny Antandroy ny fiompiana omby sy osy: ahazoana hena hohanina ; atao ho sorona ho fangataham-pitahiana ; ifanakalozana eo amin'ny fiaraha-monina (handravonana fihavanana, hangataham-bady, atolotra raha misy maty,...). Ny isan'ny omby atolotra ny fianakaviana mana-manjo raha misy maty dia miankina amin'ny rohim-pihavanana. Ireo omby atolotra hanaovana ny fasana - ka apetraka eo amboniny ireo tsifa (tandrok'omby) - dia fandofo no fiantso azy, ary fady ho an'ny fianakaviana ny mihinana ny henany. Ireo omby novonoina hamahanana ny vahoaka kosa dia atao hoe famaha.

Misahirana mifindra toerana ka momoron-tanàna vaovao mihitsy ny antandroy rehefa kentana loatra ny toerana honenany. Ohatra, rehefa kere. Ny kere ? Ringitra tanteraka ny zava-maniry koa tsy misy ny hanina. Manampy trotraka izay ny tsy fisian'ny rano na indray mitete aza ! Nefa anie dia "tany milevin-drano Androy". Efa be ihany izay fikarohana natao mikasika izay hevitra hampivoitra ny rano izay ary azo antenaina fa hahitam-bokantsoa ihany rehefa migadona ny fotoany.

Mampisongadina ny antandroy ny fikolokoloana soa toavina. Mifanjohy, mifampitohy ny fiainana an-tany sy ny fiainana an-danitra aorian'ny fahafatesana. Ny fahasarotan'ny tontolo iainana manodidina ve no mahatonga ny antandroy iandràndra fiainan-tsy hita heverina ho lavorary kokoa ? Asa ! Ny azo ambara dia anisan'ireo mponina malagasy mandala mozika sy vakoka nentim-paharazana isan'ny malaza indrindra manerana an'iMadagasikara izy ireo. Ohatra: ny beko, ny antsa sy ny tsinjake isan-karazany.

Fomba fiteny any Androy ny hoe : "aty Androy, ny fiainana toy ny fihinanan-draketa, tsy eritreretina ny tsilony".